24.04.2026 | 23:32
Կապանում ջրանջատում կլինի
Ախթալայի կամրջի փլուզման հետևանքով 7 բնակավայրի 5500 բնակչի հետ կապը կտրված է. Մկրտչյան
Հասարակություն
26.05.2024 | 22:04
Ախթալայի կամուրջի փլուզման հետևանքով կապը կտրված է Ախթալա, Շամլուղ, Մեծ Այրում, Ճոճկան, Փոքր Այրում, Բենդիկ, Քարկոփ բնակավայրերի հետ` շուրջ 5500 բնակիչ։ Այս մասին գրել է ԱԺ պատգամավոր Արեն Մկրտչյանը։
«Մոբիլիզացվել է մեծ քանակությամբ ծանր տեխնիկա` սարամիջյան գրեթե անանցանելի չգործող ճանապարհի անցանելիությունն արագորեն ապահովելու նպատակով։ Անհրաժեշտության դեպքում կգործեն ուղղաթիռներ։
Այս պահին նշված 7 բնակավայրում սննդի, առաջին անհրաժեշտության պարագաների խնդիր չկա։ Վարչական ղեկավարների աշխատանքային խմբեր են ձևավորված` կարիքների մշտադիտարկման նպատակով։ Ախթալայի ԲԿ-ն և Ճոճկանի բուժամբուլատորիան աշխատում են բնականոն ռեժիմով»։
Ավելի ուշ ԱԺ պատգամավորը հայտնեց, որ աղետի գոտում բացի նշված 7 (Ախթալա, Քարկոփ, Շամլուղ, Բենդիկ, Մեծ Այրում, Ճոճկան, Փոքր Այրում) բնակավայրերից կապը կտրված էր Ալավերդի համայնքի ևս 5 բնակավայրի` Շնողի, Թեղուտի, Նեղոցի, Հաղպատի և Ծաղկաշատի հետ (5200 բնակիչ)` Մ6 միջպետական ճանապարհի փլուզման պատճառով։
Ակներ-Հաղպատ ձորով տրանսպորտային կապ է ստեղծվել Հաղպատ և Ծաղկաշատ գյուղերի հետ։ Գյուղերն անհրաժեշտ կերպով կսնուցվեն։
Շնողի, Թեղուտի և Նեղոցի հետ կապը և սնուցումը Տավուշի մարզով կապահովվի` Արճիսի հատվածից։
