Առանց անհրաժեշտության մի մտեք ջրածածկ տարածքներ․ վարքականոններ ջրհեհեղի դեպքում

Ցամաքի որոշակի տարածքների ժամանակավոր ջրածածկ լինելը կոչվում է ջրհեղեղ: ՆԳՆ ՓԾ-ն ներկայացրել է վարքականոններ ջրհեղեղի դեպքում կիրառելու համար։

Ջրհեղեղները կարող են առաջանալ.

– երկարատև առատ տեղումներից.

– սառցադաշտերի և ձյան հալոցքի ժամանակ մեծածավալ և կենտրոնացված ջրի հոսքից.

– ջրամբարների փլուզումներից.

– հիդրոկայանների պատնեշների ճեղքումից.

– ծովային փոթորիկներից.

– ցունամիներից.

– երկրի մակերևույթ ստորգետնյա ջրերի հանկարծակի ելքից:

Ի՞նչ անել մինչև ջրհեղեղը

– Միշտ պատրաստ ունեցեք աղետի կապոց:

– Պատրաստեք ավազով լցված պարկեր:

– Մաքրեք կոյուղին:

– Պահեստավորեք խմելու ջրի և սննդի պաշար (մի քանի օրվա համար):

– Հետևեք ջրաօդերևութաբանական ազդարարման նշաններին:

– Կապիտալ շինարարություն կազմակերպեք միայն պետական համապատասխան մարմինների թույլտվությամբ:

– Նախատեսեք փրկարարական միջոցների պահուստներ (փրկարարական օղակ, փրկաբաճկոն և այլն):

– Անհրաժեշտության դեպքում կահույքը բարձրացրեք ջրի սպասվելիք մակարդակից բարձր:

– Թունավոր և վտանգավոր նյութերը տեղափոխեք ավելի ապահով տեղ:

– Ջրհեղեղի սպառնալիքի դեպքում անջատեք գազը, էլեկտրականությունը:

– Հետևեք տարահանման և ապաստարանի վերաբերյալ տեղեկատվությանը և կառավարման մարմինների ցուցումներին:

– Իմացեք ձեր բնակավայրի ռելիեֆը և ջրհեղեղի սպառնալիքի դեպքում այնտեղից անվտանգ հեռանալու ճանապարհները:

– Եթե չեք հասցրել բնակավայրից հեռանալ, ապա տրանսպորտով կամ ոտքով բարձրացեք ձեր բնակավայրին մոտ գտնվող բարձրադիր վայրերը (բլուր, լեռ և այլն):

– Պատրաստի ունեցեք լուսային ազդանշանային սարքեր:

– Ամրացրեք այն ամենը, ինչ կարող է լողալ ջրի մեջ (կահույք և այլն):

Ի՞նչ անել ջրհեղեղի ժամանակ

– Մինչև կառավարման մարմինների համապատասխան ցուցումները մնացեք ապաստարաններում:

– Աղետի կապոցը թրջվելուց զերծ պահեք:

– Եթե տանն եք, ապա ոչ մի դեպքում մի օգտվեք կենցաղսպասարկման համակարգերից` երկրորդածին աղետներից խուսափելու համար:

– Մի փորձեք կտրել-անցնել ջրային հոսքը. 15 սմ խորության ջրի արագ հոսքը վտանգավոր է մարդու համար, իսկ 50 սմ-ը` անանցանելի սովորական մեքենաների համար:

– Ծանծաղ տեղերն անցնելիս հագեք ջրակայուն պինդ կոշիկներ և օգտվեք ձեռնափայտից:

– Եթե օգնության կարիք ունեք, ապա տվեք աղետի ազդանշան (խարույկ, բղավոց, կրակոց, դրոշներ, ազդանշան և այլն):

Ի՞նչ անել ջրհեղեղից հետո

Ուշադիր հետախուզեք Ձեր կացարանը`

– հիմքի ամբողջությունը.

– պատերի, պատուհանների և հատակի վիճակը.

– հաղորդակցության համակարգը.

– թունավոր օձերի հնարավոր առկայությունը.

– ստուգեք սննդի պիտանելիությունը, սննդամթերքը լվացեք եռացրած ջրով.

– խմելու ջուրն օգտագործեք սանիտարական ստուգումից կամ եռացնելուց հետո.

– մի օգտագործեք ջրում հայտնված սննդամթերքը.

– նախքան հաղորդակցության համակարգերից օգտվելը` ստուգեք դրանց վնասվածության աստիճանը.

– հաղորդակցության համակարգերի վերանորոգումը վստահեք մասնագետներին.

– վտանգավոր է մնալ այն տանը, որը վթարային է կամ վստահություն չի ներշնչում.

– առանց անհրաժեշտության մի մտեք ջրածածկ տարածքներ: