11.08.2026 | 09:43
Արմավիրի մարզում 2026-ի առաջին կիսամյակում սպանության, սպանության փորձի և ավազակության բոլոր դեպքերը բացահայտվել են. ՆԳՆ
Նորվեգիան մայիսի 29-ից արգելել է ՌԴ-ից զբոսաշրջիկների մուտքը երկիր
Քաղաքականություն
23.05.2024 | 14:30
Նորվեգիան երկիր ՌԴ քաղաքացիների մուտքի լրացուցիչ սահմանափակումներ է մտցրել։ Մայիսի 29-ից զբոսաշրջության կամ «ոչ առաջնային» նպատակներով սկանդինավյան երկիր մեկնող ռուսների մուտքը կարգելվի։ Բացառություն կարող է արվել Ռուսաստանի այն քաղաքացիների համար, որոնք մեկնում են կա՛մ Նորվեգիայում, կա՛մ Շենգենյան գոտում մերձավոր հարազատների մոտ աշխատելու և սովորելու նպատակով, գրում է Current time-ը։
Նորվեգիայի կառավարության տարածած հաղորդագրությունում նշվում է, որ սահմանափակումը վերաբերում է ինչպես Նորվեգիայի կողմից մինչև 2022 թվականի գարունը տրված վիզա ունեցող քաղաքացիներին, այնպես էլ Շենգենյան այլ երկրների կողմից տրված վիզա ունեցողներին։
Նորվեգիան ռուսաստանցիների մուտքը սահմանափակել է Ուկրաինա ՌԴ ներխուժումից հետո և գործնականում դադարեցրել տուրիստական վիզաներ տրամադրել։
Ավելի վաղ Արևմտյան Նորվեգիայում ոստիկանության անվտանգության ծառայության ղեկավար Թորգիլս Լյուտրոն NRK-ին տված հարցազրույցում ասել էր, որ տարածաշրջանում աշխատում են ռուսական հետախուզական գործակալներ։ Նրա կարծիքով՝ Ռուսաստանը, հնարավոր է, դիվերսիա է նախապատրաստում կրիտիկական ենթակառուցվածքների դեմ։
Արևմտյան Նորվեգիայում է գտնվում Հյուսիսային Եվրոպայի ամենամեծ ռազմածովային բազան՝ Հոկոնսվերնը, ինչպես նաև նավթի ու գազի կարևոր օբյեկտներ, էլեկտրակայաններ և էլեկտրաէներգիայի հետ կապված այլ օբյեկտներ:
