23.11.2024 | 12:56
Երկրաշարժ Ադրբեջանում․ այն զգացվել է նաև Սյունիքի մարզում՝ 3-4 բալ ուժգնությամբ
Իրանի նախագահն ու արտգործնախարարը մահացել են ուղղաթիռի վթարի հետևանքով. Mehr
Քաղաքականություն
20.05.2024 | 09:08
Իրանի նախագահ Իբրահիմ Ռայիսին, Իրանի արտաքին գործերի նախարար Հոսեյն Ամիր Աբդոլլահիանը և Ադրբեջան կատարած այցից վերադարձող պատվիրակության մյուս անդամները զոհվել են ուղղաթիռի կործանման հետևանքով, հայտնում է իրանական Mehr գործակալությունը։
«Իրանի նախագահը և նրան ուղեկցողները մահացել են ուղղաթիռի վթարի հետևանքով։ Իրանի հյուսիս-արևմուտքում գտնվող լեռնային շրջանում ուղղաթիռի կործանման հետևանքով զոհվել է մեր երկրի նախագահ Իբրահիմ Ռայիսին, զոհվածների թվում է նաև արտաքին գործերի նախարար Հոսեյն Ամիր Աբդոլլահիանը»,- ասվում է գործակալության հաղորդագրությունում։
Նախագահից և արտգործնախարարից բացի, ուղղաթիռում եղել են Թավրիզի իմամ Մոհամմադ Ալի ալ-Հաշեմը, Արևելյան Ադրբեջան նահանգի ղեկավար Մալեք Ռահմատին, ուղղաթիռի անձնակազմը և անվտանգության մեկ աշխատակից։
Ռաիսիի և ողջ պատվիրակության մահվան մասին տեղեկությունը հաստատել է Իրանի փոխնախագահ Մոհսեն Մանսուրին։
Ավելի վաղ Press TV-ն, վկայակոչելով իրանական Կարմիր մահիկը, հայտնել էր, որ կործանման վայրում ողջ մնացածներ չեն հայտնաբերվել, իսկ ուղղաթիռն ամբողջությամբ այրվել է։
Հիշեցնենք՝ Իրանի նախագահ Իբրահիմ Ռայիսիի ուղղաթիռի հետ կապված միջադեպը տեղի էր ունեցել կիրակի կեսօրին։ Նախնական տվյալներով՝ այն կոշտ վայրէջք է կատարել Իրանի Արևելյան Ադրբեջան նահանգի Վերզեգանի շրջանում։
Դեպքի վայր են ուղարկվել զինված ուժերի, ոստիկանության և Իրանի Կարմիր մահիկի միության ներկայացուցիչներ, սակայն փրկարարական աշխատանքները լրջորեն բարդացել են եղանակային պայմանների և տեղանքի պատճառով։
Իրանի նախագահին տեղափոխող ուղղաթիռը կործանվել է, փրկարարները փորձում են հասնել դեպքի վայր
