«Ուժերի հավասարակշռությունը պետք է վերականգնվի». Բորել

ԵՄ դիվանագիտության ղեկավար Ժոզեպ Բորելը Le Monde-ին տված հարցազրույցում ասել է, որ ապրիլի 22-ին կհրավիրի ԵՄ արտաքին գործերի և պաշտպանության խորհրդի նիստ՝ քննարկելու, թե ինչպես կարող են բավարարվել զինամթերքի և, հնարավոր է, ավելի հրատապ՝ հակաօդային պաշտպանության հետ կապված Ուկրաինայի խնդրանքները, փոխանցում է BBC-ի ռուսական ծառայությունը:

Նա ճակատում ստեղծված իրավիճակն անվանել է «դինամիկ փակուղի»՝ նշելով, որ այն բեկումը, որն ակնկալում էր Ուկրաինան, տեղի չունեցավ, և ռուսները նոր տարածքներ են գրավում, թեև հսկայական կորուստներ են կրում։

«Ես թակում եմ անդամ երկրների դռները և ասում, որ եթե չունեն հակաօդային մարտկոցներ, թող գնեն դրանք։ Իրավիճակն աստիճանաբար փոխվում է, բայց անդամ երկրների ներդրումները մեծապես տարբերվում են։ Բոլորը կարող էին ավելին անել մեր պարտավորությունները կատարելու համար։ Իմ դերը ոչ թե այս կամ այն երկրի վրա մատ թափ տալն է, այլ միասնական դիրքորոշում մշակելը։ Խնդիրը ժամանակի մեջ չէ, այլ քանակի։ Մեկ տարի հետո կարող է արդեն ուշ լինել։ Մինչև Ուկրաինայի վերականգնման մասին խոսելը՝ պետք է խուսափել դրա կործանումից։ Patriot համակարգեր գնելն ավելի էժան է, քան ռուսների կողմից քանդված էլեկտրակայանը վերականգնելը», ասել է Բորելը:

Ըստ նրա՝ հակամարտությունը դարձել է ասիմետրիկ. Ռուսաստանին պետք չէ հաղթել, նրա համար գլխավորը չպարտվելն է։ Ուկրաինան պետք է հաղթի՝ ներխուժումը հետ մղելու համար, և դաշնակիցների գործն է՝ ձեռք բերել հարձակողական կարողություններ:

Բորելը նաև նշել է, որ Ուկրաինայի համար ամերիկյան օգնության նոր փաթեթի հետ կապված անորոշությունը ձեռնտու է Մոսկվային։

«Պուտինը կանգ չի առնի այնքան ժամանակ, քանի դեռ ԱՄՆ-ում ընտրությունները չեն կայացել։ Երբ նա տեսնում է, թե ինչպես են իրենց պահում հանրապետական օրենսդիրները, բոլոր հիմքերն ունի մտածելու, որ հանրապետական վարչակազմն իր համար ավելի լավ սցենար կլինի»,- ասել է եվրոպացի պաշտոնյան։