Ալիևը Բլինքենի հետ հեռախոսազրույցում հայտարարել է, թե Բաքուն հավատարիմ է Ալմա Աթայի հռչակագրին

Ադրբեջանական լրատվամիջոցները հայտնում են, որ ԱՄՆ պետքարտուղար Էնթոնի Բլիքենը զանգահարել է Ադրբեջանի նախագահ Իլհամ Ալիևին։ Ըստ ադրբեջանական կողմի՝ Բլինքենն ասել է, որ տեղեկություն է ստացել, որ ապրիլի 5-ին ԵՄ-ի, ԱՄՆ-ի և Հայաստանի միջև կայանալիք եռակողմ հանդիպումը անհանգստություն է առաջացրել ադրբեջանական կողմում և նշել, որ հանդիպման հիմնական թեման լինելու են Հայաստանի տնտեսական զարգացման հարցերը։

Ալիևը նշել է, որ, ըստ իր տեղեկությունների, հանդիպմանն այնպիսի հարցեր են քննարկվելու, ինչպիսիք են Հայաստանին ռազմական աջակցությունը և համատեղ զորավարժությունների անցկացումը, Ադրբեջանին սահմանակից շրջաններում ռազմական ենթակառուցվածքների ստեղծումը և Հայաստանի զինումը խաղաղության եվրոպական մեխանիզմի սկզբունքով։

«Հակաադրբեջանական նման քայլերը, այդ թվում՝ Ֆրանսիայի կողմից Հայաստանին զինելու քաղաքականությունը, խրախուսում են սպառազինությունների մրցավազքը տարածաշրջանում և կհանգեցնեն սադրանքների»,-ասել է Ադրբեջանի նախագահը։

Զրույցի ընթացքում քննարկվել են Հայաստանի և Ադրբեջանի միջև խաղաղության բանակցությունները։ Ալիևն ասել է, որ Բեռլինում խաղաղության համաձայնագրի տեքստի շուրջ արտգործնախարարների բանակցություններն «օգտակար են եղել գործընթացն առաջ տանելու առումով, և որ անհրաժեշտ է արագացնել բանակցությունները»։ Նա նաև ընդգծել է, որ, իբր, անհիմն են Արևմուտքից հնչող մեղադրանքները, որ Ադրբեջանը մտադիր է հարձակվել Հայաստանի վրա։

Ալիևը նշել է, որ ապրիլի 2-ին Փարիզում Բլինքենի հետ կայացած մամուլի ասուլիսում Ֆրանսիայի արտգործնախարարը ստել է և մեղադրել Ադրբեջանին Հայաստանի տարածքային ամբողջականությունը չճանաչելու և Հայաստանի համար վտանգի աղբյուր լինելու մեջ։  Նա ընդգծել է, որ Ադրբեջանը հավատարիմ է 2022 թվականին Պրահայի հանդիպման ժամանակ ընդունված հռչակագրին և Ալմա-Աթայի հռչակագրին։

Ալիևի ասել է, որ ապրիլի 5-ին նախատեսված ԱՄՆ-ի, Եվրամիության և Հայաստանի եռակողմ «հանդիպման իբր  ոչ թափանցիկ նախապատրաստումը, ոչ ներառական բնույթը և այն, որ այն չի հետաձգվել՝ չնայած արդարացի մեկնաբանություններին։ Ալիևը նշել է, թե հանդիպումը կհանգեցնի ոչ թե Հարավային Կովկասում խաղաղության ու համագործակցության, այլ բաժանարար գծերի ստեղծման, իսկ արդյունքում՝ լարվածության»։