08.10.2026 | 15:01
Հայտնի է ազատ ոճի ըմբշամարտի Հայաստանի հավաքականի կազմն ԱԱ-ում
Իրանի հարցերով ԱՄՆ հատուկ ներկայացուցիչը Բաքվում է
Քաղաքականություն
02.04.2024 | 12:36
Իրանի հարցերով ԱՄՆ հատուկ բանագնաց Աբրամ Փեյլին այցելել է Ադրբեջան, գրում են տեղական լրատվամիջոցները։
«Բաքվում արդյունավետ քննարկումներ են տեղի ունեցել Իրանի, պատժամիջոցների կիրառման և տարածաշրջանում տիրող իրավիճակի վերաբերյալ նախագահի օգնական Հիքմեթ Հաջիևի, փոխարտգործնախարար Սամիր Շարիֆովի, Իրանում Ադրբեջանի դեսպան Ալի Ալիզադեի և բանկային հատվածի ներկայացուցիչների հետ», – գրել է ԱՄՆ պաշտոնյան X-ի իր էջում։ Նա նաև քննարկել է «Իրանի ապակայունացնող վարքագիծը» Բաքվում Իսրայելի դեսպանի հետ։
«Տարածաշրջանում իրանական վարչակարգի ապակայունացնող վարքագծի վերաբերյալ մտահոգությունները լուծելու մեր սերտ համակարգման մասին հիանալի զրույց Ադրբեջանում Իսրայելի դեսպան Ջորդ Դիքի հետ Բաքվում: Հրաշալի է լսել Ադրբեջանի հետ Իսրայելի պատմական և մշակութային կապերի մասին»,- գրել է ԱՄՆ բանագնացը X-ի իր էջում։
Ի դեպ, Աբրամ Փեյլիի այցը տարածաշրջանային է։ Նա հանդիպումներ է անցկացրել նաև Հայաստանում ու Վրաստանում։
«Երևանում հանդիպումներ ունեցա Հայաստանի արտաքին գործերի փոխնախարար Մնացական Սաֆարյանի, Ազգային անվտանգության խորհրդի, Կենտրոնական բանկի և Պետական եկամուտների կոմիտեի հետ Իրանի, սահմանային անվտանգության, պատժամիջոցների կիրառման և Հայաստանի տնտեսական և արտաքին քաղաքականության դիվերսիֆիկացման վերաբերյալ»,- նշել է ԱՄՆ բանագնացը X-ի իր էջում։
