Գլխարկը քաշել են, բռունցքներով հարվածել գլխին, հայհոյել․ ոստիկանական բռնության հերթական դեպքը․ ՏԵՍԱՆՅՈՒԹ

Քաղաքացի Վահե Նավոյանի նկատմամբ ոստիկանության ծառայողները ֆիզիկական և հոգեբանական բռնություն են գործադրել, հարվածներ հասցրել նրան, քաշքշել, սպառնացել։ Factor TV-ի հետ զրույցում Նավոյանի փաստաբան Մարտիկ Մարտիրոսյանը պատմեց, որ այդ ամենն ուղեկցվել է իր պաշտպանյալի և նրա ընտանիքի անդամների հասցեին սեռական բնույթի հայհոյանքներով։

«Վահե Նավոյանի գլխարկը քաշել են գլխին և բռունցքով հարվածել»,- ասում է փաստաբանը։

Իսկ ինչպե՞ս է տեղի ունեցել ենթադրյալ խոշտանգումը, ի՞նչ է նախորդել այդ դեպքին․ Վահե Նավոյանը ձերբակալվել է գողության կասկածանքով, ոստիկանության Կենտրոնական բաժնի օպերլիազորները, փաստաբանի պնդմամբ, Արին Բերդի փողոցում պաշտպանյալին խոշտանգելով ցանկացել են իմանալ ենթադրյալ գողոնի վայրը։ Տեսանյութում էլ լսվում է, թե ինչպես է ոստիկաններից մեկը մի քանի անգամ հարցնում՝ մեքենան ո՞րտեղ է։

«Վահե Նավոյանին ոստիկանության ծառայողները արգելանքի են վերցրել, տեղափոխել են այն վայրը, որտեղ, ըստ իրենց, գտնվում է այդ, այսպես ասած, գողացված մեքենան և հենց ճանապարհին, այդ վայրում, ոստիկանության բաժնում՝ ամբողջ ժամանակահատվածում մի քանի ժամ շարունակ խոշտանգումը տեղի է ունեցել»,- մանրամասնում է Մարտիկ Մարտիրոսյանը։

Վահե Նավոյանը չի ընդունում իրեն առաջադրված մեղադրանքը, նա այժմ տնային կալանքի տակ է։ Նավոյանի փաստաբաններ Մարտիկ Մարտիրոսյանն ու Լուսինե Հովհաննիսյանն անազատության մեջ գտնվող իրենց պաշտպանյալին խոշտանգելու դեպքի առթիվ հանցագործության մասին հաղորդում են ներկայացրել իրավապահներին։ Մի խումբ անձանց կողմից խոշտանգում կատարելու հատկանիշներով Քննչական կոմիտեում նախաձեռնվել է քրեական վարույթ` Factor TV-ին հայտնեց Գոռ Աբրահամյանը։ Վահե Նավոյանը ճանաչվել է տուժող, սակայն դեռ չի հարցաքննվել։

Իրվապաշտպան Նինա Կարապետյանցը հիշեցնում է՝ սա առաջին դեպքը չէ, երբ ոստիկանները տարբեր իրավիճակներում հարվածում, ճնշում, սպառնում են քաղաքացիներին։ Անցյալ տարի ոստիկանության Էրեբունու բաժանմունքում բռնության զոհ էին դարձել փաստաբաններ Մարզպետ Ավագյանն ու Էմանուել Անանյանը, ավելի ուշ՝ ոստիկանության Կենտրոնական բաժնում փաստաբան Կարեն Ալավերդյանն ու նրա պաշտպանյալը։ Իրավապաշտպանի համոզմամբ՝ սա պատասխանատվության բացակայության հետևանք է․ վստահ է՝ այս անգամ էլ որևէ մեկը չի պատժվի, ավելին՝ գուցե ենթադրյալ խոշտանգումն իրականացրած ոստիկանները նշանակվեն բարձր պաշտոնների, ստանան պարգևավճարներ։

Փաստաբան Կարեն Ալավերդյանը Factor TV-ին փոխանցեց, որ իրեն խոշտանգելու գործով դեռ նախաքննություն է ընթանում։ Փաստաբանն ասաց, որ այսօր հրապարակված ենթադրյալ խոշտանգման տեսանյութում երևացող ծառայողներին ճանաչել է․ պնդում է՝ նրանցից մի քանիսը նույն օպերլիազորներն են, որոնք մեկ տարի առաջ մասնակցություն են ունեցել նաև իր հետ տեղի ունեցած միջադեպին, և այդ գործով անգամ որպես մեղադրյալ ներգրավված չեն։ Իրավապաշտպան Նինա Կարապետյանցի կարծիքով՝ այս ամենի քաղաքական պատասխանատուն Նիկոլ Փաշինյանն է։

ՆԳՆ մամուլի խոսնակ Նարեկ Սարգսյանը Factor TV-ին փոխանցեց, որ նախարարության ներքին անվտանգության և հակակոռուպցիոն վարչությունում իրավապաշտպան Դանիել Իոաննիսյանի հրապարակած տեսանյութից հետո նշանակվել է ծառայողական քննություն։ Ուշագրավ է, որ փաստաբաններ Մարզպետ Ավագյանի ու Էմանուել Անանյանի նկատմամբ բռնության միջադեպից հետո ծառայությունից ազատված ոստիկաններ Վահե Պապոյանն ու Մարտուն Եղիազարյանը վերադարձել են ծառայության։

Մանրամասները՝ տեսանյութում։
Արփի Հակոբյան