23.11.2024 | 15:05
Դոնալդ Թրամփը հայտարարել է ԱՄՆ-ի ֆինանսների նախարարի պաշտոնի հավանական թեկնածուին
Շնորհավորում եմ Ստամբուլի 16 մլն բնակիչներին՝ քրդերին, հայերին, ասորիներին․ Իմամօղլուն ընտրություններում հաղթանակից հետո ուղերձ է հղել
Քաղաքականություն
01.04.2024 | 23:30
Ստամբուլի ընդդիմադիր քաղաքապետ Էքրեմ Իմամօղլուն նախօրեին ՏԻՄ ընտրություններում հաղթանակից հետո գիշերը տիկնոջ՝ Դիլեք Իմամօղլուի և երեխաների հետ գնացել է Սարաչհանե և դիմել այնտեղ հավաքված տասնյակ հազարավոր քաղաքացիներին։ Նրան դիմավորել են «Թուրքիան աշխարհիկ է և կմնա աշխարհիկ» և «Առաջ Իմամօղլուի հետ» կարգախոսներով։ «Հանի՛ր բաճկոնդ, թևքերդ ծալիր» վանկարկումից հետո Իմամօղլուն հանել է բաճկոնն ու փողկապն ու դիմել հավաքվածներին։
«Շնորհավորում եմ, հաղթեցին 16 միլիոն ստամբուլցիները։ Այս ընտրություններում պարտվողներ չկան։ Հաջողություն Ստամբուլին։ Հաջողություն եմ մաղթում այս քաղաքի բազմազանությանը, նրա բոլոր մարդկանց, այս քաղաքի հավատալիքներին, այս քաղաքի հնագույն մշակույթին, այս քաղաքի հնագույն լեզուներին և այս քաղաքի ամեն հնագույն զգացմունքին»,-ասել է նա՝ ընդգծելով Ստամբուլի բազմամշակութայնությունը։
«Թող այն օգտակար լինի այս քաղաքի սիրելի մարդկանց, նրա բազմազանության համար, այս քաղաքի ազգության յուրաքանչյուր մարդու, յուրաքանչյուր հավատքի, ալևիների, շաֆիների, այս քաղաքի քրդերի, այս քաղաքի չերքեզների համար, այս քաղաքի բոլոր էթնիկ խմբերի մարդկանց համար։ Թող լավ լինի այս քաղաքի հավատավորների, քրիստոնյաների, հրեաների, հայերի և ասորիների համար»,-ասել է Իմամօղլուն։
Նա հայտարարել է, որ այս ընտրություններով 2019 թվականից ի վեր մի կողմ են մղել «բազմաթիվ չարիքներ ու վատնումներ»։
«Այս քաղաքում նոր մշակույթ է սկսվել։ Ազգի փողերը հիմա ազգինն են»,-ասել է Ստամբուլի քաղաքապետը՝ նշելով, որ մեկ անձի խնամակալությունն ավարտվել է։
«Դուք փոխանցել եք ձեր ուղերձը։ Ստամբուլում մարդիկ ասում էին` «Ես խաղաղության կողմնակից եմ, ես կողմ եմ հանգստությանը»: Ստամբուլը տվել է իր ուղերձը: Ազգը ցուցումներ է տալիս, մի հոգին հրահանգ չի տալիս։ Այսօր ավարտվել է մեկ անձի խնամակալությունը. Ազգն այսօր հաղթել է»,-հայտարարել է Էքրեմ Իմամօղլուն։
Թուրքիայում մարտի 31-ին կայացած ՏԻՄ ընտրություններում երկրի գլխավոր ընդդիմադիր Ժողովրդահանրապետական կուսակցությունը հաղթում է ընդհանուր պատկերում՝ առաջ անցնելով իշխող «Արդարություն ու զարգացում» կուսակցությունից։
Էմմա Չոբանյան
