Երևանը վերջին շրջանում չի մասնակցում ՀԱՊԿ քարտուղարության աշխատանքներին․ ՀԱՊԿ գլխավոր քարտուղար

Երևանն, իսկապես, վերջին շրջանում չի մասնակցում ՀԱՊԿ քարտուղարության  աշխատանքներին։ Այս մասին «Национальная оборона»-ի հետ զրույցում հայտարարել  է ՀԱՊԿ գլխավոր քարտուղար Իմանգալի Տասմագամբետովը։

«Դա Հայաստանի որոշումն է այս փուլում, և մենք՝ որպես միջազգային կազմակերպություն, հարգում ենք ինքնիշխան պետության ցանկացած որոշում։ Այնուամենայնիվ, կազմակերպության գործունեությունը շարունակվում է ամբողջ ծավալով, բոլոր ընթացակարգերը պահպանվում են ՀԱՊԿ կանոնադրական  բազային ամբողջությամբ համապատասխան։ Ընդունված և ընդունվող որոշումների մասին քարտուղարությունը տեղեկացնում է Երևանի համապատասխան կառույցներին աշխատանքային ռեժիմում։ Հայաստանի Հանրապետության պաշտոնյաների նշված հայտարարությունների առնչությամբ նշեմ, որ ՀԱՊԿ-ին անդամակցությունը կասեցնելու մասին Քարտուղարությունը Երևանից պաշտոնական հայտարարություն չի ստացել»,-ասել է կառույցի գլխավոր քարուղարը։

Հարցին, թե  նման հայտարարություն Հայաստանից սպասվո՞ւմ է, նա ասել է, որ ինքը և քարտուղարությունը աշխատում են կազմակերպության կողմից ընդունված կանոնակարգերին և ընթացակարգերին խստորեն համապատասխան:

«Մենք, իհարկե, մեր վերլուծաբանների և նրանց հասանելի գործիքների օգնությամբ վերլուծում ենք իրավիճակը Հայաստանի շուրջ և Հայաստանի ու ՀԱՊԿ հարաբերություններում։ Չեմ թաքցնի որոշակի իրադարձություններ ու տրամադրություններ Հայաստանի էլիտաների շրջանում անհանգստություն են առաջացնում։ Սակայն մենք ապավինում ենք Հայաստանի ղեկավարության քաղաքական սթափությանը և կազմակերպության հետ կապված տարբեր սցենարների իրականացման հեռանկարների հավասարակշռված գնահատականին։ Ընդգծեմ, որ Հայաստանը մնում է մեր դաշնակիցը, գործող բոլոր պարտավորությունները մնում են ուժի մեջ»,-հայտարարել է ՀԱՊԿ գլխավոր քարտուղարը։