Քաղաքականություն
25.03.2024 | 22:32
Առնվազն յոթ ռուսական նավթավերամշակող գործարաններ ուկրաինական անօդաչու թռչող սարքերի հարձակումների պատճառով դադարեցրել են արտադրական հզորությունը 2024 թվականի առաջին եռամսյակում։ Նման հաշվարկներ է կատարել Reuters-ը։
Գործակալության տվյալներով՝ անօդաչու թռչող սարքերի հարձակումների պատճառով յոթ նավթավերամշակման գործարաններ դադարեցրել են 4,6 մլն տոննա նավթի վերամշակումը կամ ընդհանուրի 7%-ը։ Վերջիններից մեկը, որը դադարեցրել է արտադրական հզորությունը, Կույբիշևի նավթավերամշակման գործարանն է, որը գտնվում է Սամարայի մարզի Նովոկույբիշևսկ բնակավայրում: Մարտի 23-ի գիշերը ԱԹՍ-ները հարձակվել են այս գործարանի վրա։
Reuters-ի աղբյուրների համաձայն՝ հարձակումից հետո գործարանը դադարեցրել է CDU-5 նավթավերամշակման բլոկի աշխատանքը, ինչի պատճառով գործարանի հզորությունը կրկնակի կրճատվել է։
Ուկրաինան վերջին ամիսներին հարձակվել է մի քանի նավթավերամշակման գործարանների, տերմինալների, պահեստների և պահուստարանների վրա, որոնք գտնվում են Ռուսաստանում և նրա կողմից օկուպացված տարածքներում:
Հարձակումների ֆոնին Ռուսաստանի իշխանությունները մարտից վեց ամսով արգելել են բենզինի արտահանումը՝ աճող պահանջարկի պայմաններում ներքին շուկայում գները կայունացնելու նպատակով։
«Ռուսաստանի նավթավերամշակման հզորությունը, ամենայն հավանականությամբ, ժամանակավորապես կրճատվել է Ռուսաստանի տարածքում գտնվող նավթավերամշակման գործարաններին ուկրաինական անօդաչու թռչող սարքերի բազմաթիվ հարվածների արդյունքում»,- նշում է բրիտանական հետախուզությունը:
ԱՄՆ իշխանությունները կոչ են արել Ուկրաինային դադարեցնել հարձակումները Ռուսաստանի էներգետիկ ենթակառուցվածքների վրա, ավելի վաղ հայտնել էր Financial Times-ը՝ հղում անելով իր աղբյուրներին:
