Ադրբեջանում ահաբեկչություններ նախապատրաստող տղամարդու են կալանավորել

Ադրբեջանում տղամարդ է կալանավորվել, որը երկրում ահաբեկչական գործողություններ է նախապատրաստել։ Ադրբեջանական լրատվամիջոցները, վկայակոչելով Պետական անվտանգության ծառայությանը, հայտնում են, որ իրականացված հետաքննության ընթացքում հիմնավոր կասկածներ են առաջացել, որ ՌԴ Մուրմանսկ քաղաքում բնակվող 1988 թվականին ծնված Ադրբեջանի քաղաքացի Բահրուզ Ասկերովը դավադրություն է կազմակերպել այլ անձանց հետ և  ծրագրել է ահաբեկչական հարձակումներ իրականացնել։

Պարզվել է, որ Բահրուզ Ասկերովը, գաղտնի կերպով երկրի տարբեր  շրջաններում ներգրավելով անձանց, նրանց հանձնարարականներ է տվել՝ կազմակերպել Լենքորան քաղաքի գործադիր իշխանության ղեկավարի դեմ մահափորձ։ Պարզվել է նաև, որ Բահրուզ Ասկերովն այդ անձանց հանձնարարել է մահափորձ իրականացնել հանրապետության որոշ շրջաններում անգլերեն դասավանդող օտարերկրյա քաղաքացու նկատմամբ։

Բացի այդ, ըստ ադրբեջանական կողմի հաղորդագրության, Բահրուզ Ասկերովը նախատեսել է զորավարժություններ անցկացնել օտար երկրի տարածքում մարդկանց հետ, որոնց հետ շփվել է, սակայն Պետանվտանգության ծառայության ձեռնարկած միջոցների արդյունքում չի կարողացել դրանք ի կատար ածել։

Ասկերովը ձերբակալվել է, քրեական գործ է հարուցվել ՔՕ 28, 214.2.1 (ահաբեկչության նախապատրաստում) հոդվածներով, դատարանը որպես խափանման միջոց է ընտրել կալանավորումը։

Շարունակվում են բազմակողմանի քննչական և օպերատիվ միջոցառումները՝ քրեական գործի բոլոր մանրամասները պարզելու համար։