24.04.2026 | 23:32
Կապանում ջրանջատում կլինի
Գագիկ Խաչատրյանի գործով դատավորին պաշտոնավարման ժամկետի ավարտից 3 ամիս առաջ ցանկանում են գործուղել Սյունիքի մարզ
Հասարակություն
21.03.2024 | 17:11
Բարձրագույն դատական խորհուրդը Հանրապետության նախագահին առաջարկել է Երևանի դատարանի նախկին նախագահ, այժմ՝ քրեական մասնագիտացմամբ դատավոր Արթուր Պետիկի Մկրտչյանին Սյունիքի մարզի դատավոր նշանակել։ Այս մասին տեղեկանում ենք Բարձրագույն դատական խորհրդի կայքից։ Ըստ կայքում առկա տեղեկատվության՝ ԲԴԽ որոշման համար հիմք են հանդիսացել Արթուր Մկրտչյանի և Սյունիքի մարզի դատարանի դատավոր Վահե Ջիվանյանի կողմից ներկայացված պաշտոնների փոխանակման դիմումները։ Այսինքն՝ Մկրտչյանի՝ Սյունիք տեղափոխվելու դեպքում Սյունիքի դատավոր Վահե Ջիվանյան էլ կտեղափոխվի Երևանի դատարան։
Նշենք, որ Արթուր Մկրտչյանի վարույթում է քննվում ՊԵԿ նախկին նախագահ Գագիկ Խաչատրյանի և նրա եղբորորդու գործը, և եթե նախագահը ստորագրի այս դատավորին Սյունիքում նշանակելու հրամանագիրը, ապա Խաչատրյանի գործի քննությունը կսկսվի նորից։
Հիշեցնենք, որ Դատական դեպարտամենտը վերջերս երկար տևած դատավարությունների մասին ֆիլմ էր պատրաստել, որտեղ ներառվել էր նաև Գագիկ Խաչատրյանի գործը, իսկ այժմ ստացվում է, որ Բարձրագույն դատական խորհուրդն իր գործողություններով նպաստում է, որ երկարատև դատավարությունը նորից սկսվի։
Հատկանշական է այն հանգամանքը, որ Արթուր Մկրտչյանին Սյունիք տեղափոխելու դեպքում նրան նոր քրեական գործեր չեն մակագրվելու․ նրա պաշտոնավարման ժամկետն այս տարվա հունիսի 21-ին լրանում է, իսկ Դատական օրենսգրքի համաձայն դատավորի անունը գործերի բաշխման ցանկից հանվում է պաշտոնավարման ավարտից 3 ամիս առաջ։
Այս դեպքում հարց է առաջանում՝ արդյո՞ք առավել նպատակահարմար չէր, որ այս դատավորը մնար Երևանի դատարանում և մինչև պաշտոնավարման ժամկետի ավարտը փորձեր ավարտել իր վարույթում արդեն իսկ եղած գործերը՝ Սյունիք տեղափոխվելու փոխարեն։
Արաքս Մամուլյան
