ԶԼՄ-ները հայտնում են Կուրսկի և Բելգորոդի շրջաններ դիվերսանտների ներթափանցման մասին

Ռուս ռազմական բլոգերներն ու Baza տելեգրամ-ալիքն առավոտից տեղեկություններ են տարածում, որ ՌԴ Կուրսկի շրջանի Տետկինո բնակավայրի մոտ, որը գտնվում է Ուկրաինայի հետ սահմանին, «հրաձգություն է ընթանում», «աշխատում է նաև հրետանին»։ Այլ հաղորդագրություններում էլ հիշատակվում է Բելգորոդի շրջանում նման իրավիճակի մասին, փոխանցում է BBC-ի ռուսական ծառայությունը։

ՌԴ-ում ահաբեկչական կազմակերպություն ճանաչված և արգելված «Ազատություն Ռուսաստանին» տելեգրամ-ալիքն էլ հրապարակել է «Անցել ենք սահմանը» գրառում և գիշերը նկարահանված տեսանյութ, որում երևում է ինչ-որ զրահամեքենայի շարժ։

Իր հերթին, «ՌԲԿ Ուկրաինա»-ն, վկայակոչելով հատուկ ծառայություններում աղբյուրներին, պնդում է, որ ինչ-որ «Սիբիրյան լեգեոն», ՌԴԿ-ն և «Ազատություն Ռուսաստանին»-ը Բելգորոդի շրջանում «մարտեր են մղում»։

Միաժամանակ, Ուկրաինայի Պաշտպանության նախարարության հետախուզության գլխավոր վարչության ներկայացուցիչն ասել է, որ խմբավորումները «գործում են որպես ինքնուրույն ստորաբաժանումներ, քանի որ կազմված են ՌԴ քաղաքացիներից»։

«Հավանաբար, այժմ տվյալ ստորաբաժանումների համատեղ գործողությունն է տեղի ունենում»,- ասել է նա «24 ալիք»-ին։

ВГТРК-ի աշխատակից Անդրեյ Ռուդենկոն տելեգրամում գրառմամբ պնդում է, որ «Բելգորոդի շրջանում հակառակորդը ճեղքման փորձ է կատարել և Գրայվորոնսկի շրջանի հարավ-արևելյան սահման ուղարկել երեք զրահափոխադրիչ»։ Ռուդենկոյի տվյալներով՝ Կուրսկի շրջանում Տետկինոյի մոտ «սահմանը ճեղքելու փորձ է եղել», «թշնամու ուժերի մի մասը ոչնչացվել է, մնացածը՝ նահանջել»։

ՌԴ իշխանությունները պաշտոնապես այս մասով տեղեկություններ չեն հաղորդում։

Բելգորոդի նահանգապետ Վյաչեսլաբ Գլադկովը, որը հայտնել էր մարտի 12-ի գիշերը ԱԹՍ-ների հարձակման մասին, այժմ հաղորդում է, որ Ուկրաինայի ԶՈւ-ի կրակի տակ է հայտնվել Շերբեկինո քաղաքը։ Ըստ նրա՝ կա մեկ տուժած, քաղաքում տարբեր վնասներ են հասցվել վեց մասնավոր տնային տնտեսությունների, խանութների, կենտրոնական շրջանային հիվանդանոցին, մանկապարտեզին և տեխնիկումին։