27.04.2026 | 18:48
Տիկին Հակոբյանը ծանր է տանում դատական հայցի ներկայացումն իր դեմ. հետ չենք վերցնելու. Իոաննիսյան. ՏԵՍԱՆՅՈՒԹ
Խորապես անհանգստացած ենք․ ԱՄՆ Պետդեպը՝ Ադրբեջանում լրագրողների ու ակտիվիստների նոր ձերբակալությունների մասին
Քաղաքականություն
07.03.2024 | 13:24
ԱՄՆ-ը «խորապես անհանգստացած» է տեղեկություններով, որ ադրբեջանական ոստիկանությունը խուզարկություն է իրականացրել Toplum TV անկախ լրատվամիջոցի խմբագրությունում, ինչպես նաև անկախ լրագրողների և քաղաքացիական հասարակության ակտիվիստների ձերբակալություններով։ Այս մասին ճեպազրույցում հայտարարել է Պետքարտուղարության խոսնակ Մեթյու Միլլերը՝ պատասխանելով Ադրբեջանում ԶԼՄ-ների դեմ շարունակվող ճնշումների մասին Թուրան գործակալության հարցին։
«Մենք խորապես անհանգստացած ենք այն հաղորդումներից, որ ադրբեջանական ոստիկանությունը ներխուժել է Toplum TV անկախ լրատվամիջոցի գրասենյակ, Ադրբեջանում բազմաթիվ անկախ լրագրողների և քաղաքացիական հասարակության ակտիվիստներ են ձերբակալվել։ Մենք պետք է արտահայտենք մեր խիստ առարկությունները լրագրողներին, քաղաքացիական հասարակության ներկայացուցիչներին և ընդդիմադիր գործիչներին ահաբեկելու, ճնշելու և պատժելու շարունակական փորձերի հետ կապված: Մենք կոչ ենք անում Ադրբեջանին՝ դադարեցնել իրենց հիմնարար ազատությունները իրականացնողների հետապնդումները և ազատ արձակել բոլոր այն անձանց, որոնք անարդարացիորեն պահվում են քաղաքական դրդապատճառներով մոտիվացված գործերով։ Ոչ ոք չպետք է ենթարկվի բանտարկության կամ այլ պատժի՝ խոսքի ազատությունն իրացնելու համար»,- ասել է Միլլերը։
Դիտարկմանը, որ նախորդ ճնշումների ալիքի ժամանակ հնչեցված կոշտ առարկությունները չեն խանգարել իշխանություններին նորից ձերբակալել լրագրողների, ինչո՞ւ պետք է հիմա այլ իրավիճակ լինի, Միլլերը նշել է, որ իշխանությունները պետք է դադարեցնեն այդ գործողությունները։
«Ես չեմ խոսի տարբեր եզրակացություններ անելու մասին։ Ես կասեմ, որ նրանք պետք է դադարեցնեն այս գործողությունները, որոնք ճնշում են ազատ արտահայտվելու դեմ, քանի որ դա բխում է սեփական ժողովրդի շահերից: Կարող եմ ձեզ վստահեցնել, որ երբ մենք մասնավոր դիվանագիտական զրույցներ ենք ունենում ադրբեջանցի պաշտոնյաների հետ, ինչպես պետքարտուղարն առիթ ուներ դա անել անցյալ ամիս»,- հայտարարել է Պետքարտուղարության խոսնակը։
Հավելենք, որ նախօրեին Ադրբեջանում ոստիկանությունը խուզարկություններ է իրականացրել Toplum TV անկախ լրատվամիջոցի խմբագրությունում ու «3-րդ հանրապետություն» հարթակի գրասենյակում։ Արդյունքում ձերբակալվել են տասնյակ լրագրողներ ու ակտիվիստներ։
Էմմա Չոբանյան
