16.03.2026 | 19:53
«10 տարի առաջ եմ դիմումը գրել»․ արքեպիսկոպոսը պնդում է՝ Գարեգին Բ-ն միայն հիմա է որոշել արձագանքել իր գրությանը
Հանձնարարվել է սահմանել խիստ հսկողություն շինբարեկարգման ծրագրերի շրջանակում իրականացվող աշխատանքների ժամկետների և որակի ուղղությամբ
13.08.2018 | 20:36
Երևանի քաղաքապետարանում կայացած աշխատանքային խորհրդակցության ժամանակ, որը վարել է Երևանի քաղաքապետի առաջին տեղակալ, Երևանի քաղաքապետի պաշտոնակատար Կամո Արեյանը, զեկուցվել է, որ սահմանված ժամանակացույցով շարունակվում են քաղաքապետարանի 2018թ. ծրագրով նախատեսված նախադպրոցական, առողջապահական, մշակութային կազմակերպությունների շենքերի, բակային տարածքների և խաղահրապարակների հիմնանորոգման, փողոցների բարեկարգման ու ասֆալտապատման, թեքահարթակների կառուցման և վթարային պատշգամբների, շենքերի մուտքերի, հարթ և թեք տանիքների վերանորոգման աշխատանքները։
Ինչպես տեղեկացրին Երևանի քաղաքապետարանի տեղեկատվության և հասարակայնության հետ կապերի վարչությունից, աշխատակազմի համապատասխան վարչություններին և վարչական շրջանների ղեկավարներին հանձնարարվել է բոլոր ուղղություններով ակտիվացնել աշխատանքները՝ դրանք սահմանված ժամկետում և որակով ավարտելու ուղղությամբ։ Կամո Արեյանը հանձնարարել է նաև շինբարեկարգման ծրագրերի շրջանակում խստագույն հսկողություն սահմանել տեխնիկական հսկիչների գործունեության նկատմամբ՝ մեկ անգամ ևս հիշեցնելով, որ հենց նրանք են պատասխանատու վերջնական և որակյալ աշխատանքի համար: Այս համատեքստում հանձնարարվել է լրջագույն հսկողություն սահմանել ֆինանսական միջոցների արդյունավետ օգտագործման ուղղությամբ, ինչպես նաև շինարարական աշխատանքների կատարողականները ստորագրել միայն կատարված աշխատանքները տեղում լիարժեք ուսումնասիրելուց հետո և որակի վերաբերյալ համապատասխան եզրակացության առկայության դեպքում:
Չնախատեսված վայրերում կենցաղային և շինարարական աղբը թափելու դեպքերի հայտնաբերման ու կանխարգելման աշխատանքների մասով՝ իրավաբանական վարչության պետը զեկուցել է, որ նախորդ շաբաթվա ընթացքում կազմվել է 6 վարչական արձանագրություն: «Սանիթեք» ընկերության աշխատանքի արդյունքները հերթական անգամ գնահատելով անբավարար և մտահոգիչ՝ Կամո Արեյանը հանձնարարել է ակտիվացնել դրանք և բոլոր ռեսուրսները կենտրոնացնել պատշաճ սպասարկումն ապահովելու ուղղությամբ, ինչը ենթադրում է ոչ միայն կուտակված աղբի տեղափոխում, այլև աղբամանների և աղբամուղերի ախտահանում:
Կամո Արեյանը հանձնարարել է վարչական շրջանների ղեկավարներին ուժեղացնել ամենօրյա հսկողությունը աջակցության տարածքային բաժինների աշխատանքների նկատմամբ, օրենսդրության պահանջներին համապատասխան ապահովել ընտանեկան նպաստների նշանակման հասցեականությունը՝ իսպառ բացառելով կոռուպցիոն ռիսկերն ու քաղաքացիների հետ անօրինական պայմանավորվածությունների հնարավորությունը: Սոցիալական աջակցության բաժինների պետերն անձնապես կրելու են յուրաքանչյուր գործի վարման օրինականության ողջ պատասխանատվությունը:
Կամո Արեյանի մեկ այլ հանձնարարականով առաջիկա շաբաթվա ընթացքում կուսումնասիրվեն մայրաքաղաքի բոլոր բակային տարածքների խաղահրապարակներում առկա կարուսելներն ու մարզագույքը՝ դրանց անվտանգ շահագործումն ապահովելու նպատակով, անհրաժեշտության դեպքում կատարելով նաև դրանց ամրացման աշխատանքներ:
Անդրադառնալով Ասիական զարգացման բանկի կողմից ֆինանսավորվող ճանապարհաշինական աշխատատնքների ընթացքին, «Երքաղլույս» ՓԲԸ-ի տնօրեն Վարդան Գաբրիելյանին, Քաղաքային կայուն զարգացման ներդրումային ծրագրի ղեկավար Նորա Մարտիրոսյանին՝ հանձնարարվել է համատեղ ուսումնասիրել և ավարտել Աշտարակի խճուղու նոր ճանապարհահատվածի հենասյուների և մալուխային ցանցի վերատեղադրումը: Աշխատակազմի արտաքին ձևավորման և գովազդի, ինչպես նաև իրավաբանական վարչություններին էլ հանձնարարվել է վերոնշյալ տարածքում իրականացնել գովազդային վահանակների տեղափոխման, անհրաժեշտության դեպքում ապամոնտաժման աշխատանքներ:
