Հակառակորդը շարունակել է խախտել հրադադարի պահպանման ռեժիմը

Արցախաադրբեջանական շփման գծում այս գիշեր ևս հակառակորդը կրակոցներ է արձակել, սակայն իրադրությունը համեմատաբար հանգիստ է եղել։ Այս մասին Factor.am-ին հայտնեց Արցախի ՊԲ մամուլի քարտուղար Սենոր Հասրաթյանը։

Հիշեցնենք, որ ըստ Արցախի ՊԲ հաղորդագրության՝ հուլիսի 2-ից 8-ն ընկած ժամանակահատվածում արցախա-ադրբեջանական հակամարտ զորքերի շփման գոտում նկատվել է լարվածության աճ: Ընդհանուր առմամբ հակառակորդը հրադադարի պահպանման ռեժիմը խախտել է ավելի քան 300 անգամ՝ առաջնային գծի տարբեր հատվածներում կիրառելով նաև 60, 82 և 120 միլիմետրանոց ականանետեր, Դ-44 տիպի հրանոթներ ու նռնականետեր:

Նկատենք, որ հուլիսի 4-ին ադրբեջանական զինուժը նախորդ տարվա ապրիլյան ռազմագործողություններից հետո առաջին անգամ շփման գծի հարավային հատվածում կիրառել է նաև 122 մմ-ոց Դ-30 հաուբից հրանոթներ և ՏՌ-107 տիպի համազարկային հրթիռային կայանքներ՝ հարվածի թիրախ դարձնելով այդ ուղղությամբ տեղակայված հայկական բնագծերը:

Հակառակորդի կողմից հրադադարի խախտման արդյունքում ծանր վիրավորում ստացած զինծառայողներն այսօր կտեղափոխվեն ՊՆ կենտրոնական կլինիկական հոսպիտալ։ Այս մասին մեզ հետ զրույցում տեղեկացրին Ստեփանակերտի զինվորական հոսպիտալից։

Հիշեցնենք նաև՝ ադրբեջանական զինուժի արկակոծության արդյունքում հուլիսի 7-ին տարբեր աստիճանի բեկորային վիրավորումներ են ստացել ՊԲ զինծառայողներ Ռոբերտ Նովրուզի Գասպարյանը, Համբարձում Կարապետի Հարությունյանը և Վահե Գագիկի Բադալյանը։