25.02.2026 | 14:00
Ուկրաինական ԱԹՍ-ները հարձակվել են Սմոլենսկի քիմիական գործարանի վրա, զոհվել է 4 մարդ
Իսրայելը հայտնել է Ռաֆահի վրա հարձակման ամսաթիվը, եթե ՀԱՄԱՍ-ը չազատի պատանդներին
Քաղաքականություն
19.02.2024 | 11:16
Իսրայելի ռազմական կաբինետի նախարար Բենի Գանցը նախազգուշացրել է, որ եթե ՀԱՄԱՍ-ը չազատի Գազայում պահվող բոլոր պատանդներին, Իսրայելը մարտի 10-ին հարձակում կսկսի գոտու հարավում գտնվող Ռաֆահ քաղաքի վրա, գրում է BBC-ի ռուսական ծառայությունը։
Իսրայելն առաջին անգամ Գազայի հարավային այս քաղաքում օպերացիայի հստակ ժամկետ է նշել, որտեղ մոտ 1,5 միլիոն պաղեստինցիներ են ապաստանել։
Ավելի վաղ ՄԱԿ-ի առողջապահական գործակալությունը հայտնել էր, որ Գազայի առանցքային հիվանդանոցներից մեկը դադարել է գործել Իսրայելի հարձակումից հետո։
Առողջապահության համաշխարհային կազմակերպությունը (ԱՀԿ) հայտնել էր, որ կազմակերպությանը չեն թույլատրել մտնել Ռաֆահից հյուսիս գտնվող Խան Յունիս քաղաքի Նասեր հիվանդանոց՝ իրավիճակը գնահատելու համար:
Հինգշաբթի Իսրայելի Պաշտպանության բանակը (IDF) մտել է հիվանդանոցային համալիր՝ հայտնելով, որ հետախուզական տվյալները ցույց են տալիս, որ այնտեղ են պահվում ՀԱՄԱՍ-ի կողմից վերցված պատանդները: Իսրայելական բանակը Խան Յունիսում իր գործողություններն անվանել է «ճշգրիտ և սահմանափակ»՝ մեղադրելով ՀԱՄԱՍ-ին «հիվանդանոցները ցինիկաբար ահաբեկչության նպատակով օգտագործելու համար»:
«Աշխարհը պետք է իմանա, նաև ՀԱՄԱՍ-ի առաջնորդները պետք է իմանան, որ եթե մեր պատանդները տուն չվերադառնան մինչև Ռամադան, մարտերը կշարունակվեն ամենուր, այդ թվում՝ Ռաֆահի շրջանում»,- ասել է Իսրայելի պաշտպանության նախկին նախարար Բենի Գանցը:
Ռամադանը՝ իսլամական ծոմապահության սուրբ ամիսը, այս տարի սկսվում է մարտի 10-ին։
Գանցը հավելել է, որ Իսրայելը կգործի «համակարգված կերպով՝ հեշտացնելու խաղաղ բնակիչների տարհանումը ամերիկացի և եգիպտացի գործընկերների հետ երկխոսության միջոցով՝ նվազագույնի հասցնելու քաղաքացիական անձանց շարքում զոհերը»:
