Քաղաքականություն
14.02.2024 | 23:17
Էստոնիան նախազգուշացրել է Ռուսաստանի հետ սահմանի հնարավոր փակման մասին՝ Ռուսաստանի Դաշնությունից անօրինական միգրանտների հոսքի պատճառով, գրում է DW-ի ռուսական ծառայությունը։
«Վերջին շաբաթների ընթացքում Ռուսաստանը միտումնավոր կերպով օտարերկրացիների խմբեր է ուղարկում Էստոնիայի սահման, որոնք օրինական իրավունք չունեն մուտք գործել Եվրամիություն»,- ասվում է Էստոնիայի ոստիկանության տարածած մամուլի հաղորդագրությունում:
Փաստաթղթում ընդգծվում է, որ եթե այսպես շարունակվի, Էստոնիան կփակի «անցակետերը՝ ազգային անվտանգությունն ու հասարակական կարգը պաշտպանելու համար, ինչպես արդեն արել է Ֆինլանդիան միգրացիոն ճնշման ֆոնին»։
Հիշեցնենք, որ Ֆինլանդիան փակել է Ռուսաստանի հետ սահմանը 2023 թվականի նոյեմբերին։ Այն փակ կմնա մինչև առնվազն ապրիլի 14-ը։ Ֆինլանդիայի իշխանությունները նաև մեղադրել են Ռուսաստանին այն բանում, որ դիտավորյալ խրախուսում է օտարերկրացիներին ապաստան խնդրել Ֆինլանդիայում՝ ապակայունացնելով իրավիճակը երկրում։
Ներկայում ռուս-էստոնական սահմանը հատող անձանց արդեն բաժանվում են ռուսերեն և անգլերեն նախազգուշացումներ սահմանի հնարավոր փակման մասին։
