13.12.2025 | 15:42
Ռոնալդուն կնկարահանվի «Ֆորսաժ» ֆիլմում
Բաքուն Բորելին մեղադրել է «միակողմանի հայամետ» դիրքորոշման համար
Քաղաքականություն
14.02.2024 | 11:45
Ադրբեջանի ԱԳՆ-ն իր դժգոհությունն է հայտնել ԵՄ դիվանագիտության ղեկավար Ժոզեպ Բորելի՝ նախօրեին արած հայտարարությունների առնչությամբ։
«Մենք դատապարտում և մերժում ենք Ադրբեջանին ուղղված անհիմն մեղադրանքները, որոնք արտահայտվել են Եվրամիության արտաքին գործերի և անվտանգության քաղաքականության հարցերով բարձր ներկայացուցիչ Ժոզեպ Բորելի կողմից փետրվարի 13-ին Հայաստանի արտգործնախարար Արարատ Միրզոյանի հետ համատեղ մամուլի ասուլիսի ժամանակ»,- ասվում է հայտարարության մեջ։
Նշվում է, թե Բորելը, իբր, զբաղվում է «ագրեսիա կատարած Հայաստանին սպիտակեցնելով»։ ՀՀ-ի դեմ հերթական ագրեսիայի հետ կապված Բաքուն նշել է, թե «Ադրբեջանի կողմից սադրանքին ի պատասխան ձեռնարկված քայլերը եղել են համարժեք և լոկալ բնույթ»։
Բաքուն ևս մեկ անգամ հրաժարվել է զորքերի հայելային հետքաշման մասին Բորելի հնչեցրած առաջարկից՝ նշելով, թե այն, իբր, «գործնական նշանակություն չունի» և «ափսոսանք է առաջացնում»։
«ԵՄ-ն պետք է հաշվի առնի, որ Հայաստանի կողմից սահմանամերձ շրջաններում ԵՄ առաքելության հովանավորությամբ տեղակայված «վարձկանները» վտանգում են ադրբեջանցի զինվորականների և քաղաքացիական անձանց կյանքը։ Եվս մեկ անգամ ափսոսանքով նշում ենք, որ չնայած Եվրոպական խորհրդի ղեկավար Շառլ Միշելի նախաձեռնություններին՝ արտաքին հարաբերությունների և անվտանգության քաղաքականության գերագույն ներկայացուցիչը, միակողմանի հայամետ դիրքորոշում որդեգրելով, միտումնավոր անջրպետ է ստեղծում Ադրբեջանի և ԵՄ ինստիտուտների միջև՝ Եվրամիությունն ավելի մեկուսացվելով Ադրբեջանի և Հայաստանի միջև հարաբերությունների կարգավորման գործընթացից»,- եզրափակում է Ադրբեջանի ԱԳՆ-ն։
Հիշեցնենք, որ նախօրեին անդրադառնալով ՀՀ-ի դեմ Ադրբեջանի հերթական ագրեսիային՝ Ժոզեպ Բորելը կարևորել էր զորքերը հետ քաշելու անհրաժեշտությունը։
«Ադրբեջանական զինծառայողների ուղղությամբ հայկական կողմի կրակոցները ցավալի էին, բայց ադրբեջանական կողմի պատասխանն էլ անհամաչափ էր։ Նրանք անտեսել են ՀՀ պաշտպանության նախարարի հայտարարությունն այն մասին, որ այս միջադեպը պետք է մանրամասն հետաքննել։ Սա կրկին ընդգծում է զորքերը հետ քաշելու հրատապ անհրաժեշտությունը»,- ասել էր Բորելը։
Օրերս էլ Բաքուն Ադրբեջանում ԵՄ պատվիրակության ղեկավար Պետեր Միխալկոյին կանչել էր ԱԳՆ՝ դժգոհություն հայտնելով ՀՀ-ում տեղակայված Եվրամիության քաղաքացիական դիտորդական առաքելության գործունեությունից։
Էմմա Չոբանյան
