01.05.2026 | 12:08
ԵԽ-ի բանաձևում Արցախի հիշատակման պատճառով Բաքվում ԵՄ դեսպանն Ադրբեջանի ԱԳՆ է կանչվել․ բողոքի նոտա է հանձնվել
Իսրայելի բանակը հաստատել է ՀԱՄԱՍ-ի զինյալների կողմից պահվող 136 պատանդներից 31-ի մահը
Քաղաքականություն
07.02.2024 | 22:18
Իսրայելի պաշտպանության բանակը հաստատել է ՀԱՄԱՍ-ի մոտ գերության մեջ մնացած 136 պատանդներից 31-ի մահը։ Այս մասին ճեպազրույցի ժամանակ հայտարարել է Իսրայելի պաշտպանության բանակի խոսնակ Դանիել Հագարին՝ մեկնաբանելով The New York Times-ի հրապարակումը, գրում է Times of Israel-ը։
Նախօրեին թերթը, վկայակոչելով իսրայելական հետախուզությանը, գրել էր 32 պատանդների մահվան մասին։ Ըստ NYT-ի՝ նրանցից 30-ը մահացել են հոկտեմբերի 7-ին ՀԱՄԱՍ-ի և Իսրայելի միջև նոր պատերազմի սկսվելուց հետո, իսկ երկուսը՝ 2014 թվականին՝ նախորդ հակամարտության ժամանակ, և այդ ժամանակից նրանց մարմինները պահվում են Գազայի հատվածում։
Հագարին պարզաբանել է, որ մինչ այժմ Իսրայելի պաշտպանության բանակը հաստատել է հոկտեմբերի 7-ին գերեվարված 29 պատանդների և 2014 թվականին առևանգված ու սպանված երկու զինվորների՝ Օրոն Շաուլի և Հադար Գոլդինի մահը։ 31 պատանդների ընտանիքներն արդեն ծանուցվել են իրենց սիրելիների մահվան մասին, հավելել է նա։
NYT-ը, վկայակոչելով երկու պաշտոնյաների, գրում է, որ մահացած պատանդներից մի քանիսը սպանվել են դեռևս Իսրայելի տարածքում հոկտեմբերի 7-ին, իսկ ՀԱՄԱՍ-ի զինյալները նրանց մարմիններն իրենց հետ տարել են Գազայի հատված։ Մյուսները վիրավորվել են հարձակումների ժամանակ և ստացած վնասվածքներից մահացել գերության մեջ։
Բացի այդ, իսրայելցի չորս պաշտոնյաներ պարբերականին հայտնել են, որ իսրայելական հետախուզության դեռևս չհաստատված տեղեկությունների համաձայն՝ ՀԱՄԱՍ-ի գերության մեջ կարող էր սպանվել ևս առնվազն 20 պատանդ: Այսպիսով, գրոհայինների մոտ գերության մեջ են մնում մոտ 80 ողջ պատանդներ։
Ըստ եգիպտացի պաշտոնյաների՝ ՀԱՄԱՍ-ը հայտարարել է, որ չգիտի սպանված պատանդների ճշգրիտ թիվը:
