23.02.2026 | 20:00
Իրանի դեմ ԱՄՆ-ի ռազմական գործողությունների վտանգը մեծ է․ դիվանագիտական գործարքի շանսը նվազ է․ Արմեն Պետրոսյան․ ՏԵՍԱՆՅՈՒԹ
Պուտինն առաջիկայում կայցելի Թուրքիա․ հայտնի է քննարկումների օրակարգը
Քաղաքականություն
05.02.2024 | 13:27
Թուրքիայի արտաքին գործերի նախարար Հաքան Ֆիդանը A haber-ի հետ հարցազրույցում հաստատել է ՌԴ նախագահ Վլադիմիր Պուտինի մոտալուտ այցը երկիր՝ չհայտարարելով ստույգ ամսաթիվը։ Նա նշել է, որ Պուտինի այցն իրականում նախապես ծրագրված էր:
«Հիմա այս այցի ընթացքում հնարավորություն կլինի կրկին քննարկել որոշ հարցեր»,- ասել է Ֆիդանը՝ նշելով, որ բանակցությունների օրակարգում են լինելու էներգետիկան, պատերազմը Գազայում, Սևծովյան առևտրային ուղիները և Սիրիան։ Ֆիդանը հույս է հայտնել, որ Ռուսաստանը, որի հետ «Թուրքիան սերտ հարաբերություններ ունի շատ ոլորտներում, ներառյալ՝ էներգետիկան, աչք չի փակի Սիրիայում YPG-ի և PKK-ի ահաբեկչական կազմակերպությունների վրա»։
Ըստ Թուրքիայի ԱԳ նախարարի՝ Ռուսաստանը Անկարային մոտ դիրքորոշում ունի Իսրայել-Պաղեստին հարցում։ Ֆիդանը հայտարարել է, որ Ռուսաստան-Ուկրաինա խնդրի առնչությամբ հացահատիկային միջանցքը ևս մշտապես գտնվում է Անկարայի օրակարգում։
«Պարոն Պուտինի այցի ժամանակ այս հարցը միանշանակ կլինի սեղանին։ Հատկապես աշխարհի հարավային երկրներ և Աֆրիկայի աղքատ բնակչությունը զրկված է ցորենից»,- նշել է նա։
Լրատվամիջոցների հաղորդմամբ՝ Պուտինի Թուրքիա այցը տեղի է ունենալու փետրվարի 12-ին։ Այս ամսաթիվը, սակայն, ռուսական ու թուրքական կողմերը պաշտոնապես չեն հաստատել։ Պուտինի և Էրդողանի վերջին հանդիպումը տեղի է ունեցել 2023 թվականի սեպտեմբերին Սոչիում, սակայն նրանք հաճախ են հեռախոսազրույցներ ունենում։
Էմմա Չոբանյան
