15.01.2026 | 12:55
Արաղչին հայտարարել է, որ ցուցարարներին կախաղան հանելու ծրագիր չկա, իսկ Թրամփին կոչ արել՝ չկրկնել հունիսյան պատերազմի «սխալը»
Կրեմլում հուսով են, որ Միջազգային քրեական դատարանին ՀՀ-ի միանալը չի ազդի երկկողմ հարաբերությունների վրա
Քաղաքականություն
01.02.2024 | 14:41
Հայաստանի անդամակցությունը Միջազգային քրեական դատարանին նրա ինքնիշխան գործն է, Ռուսաստանի համար կարևոր է, որ այն բացասաբար չանդրադառնա Մոսկվայի և Երևանի հարաբերությունների վրա։ Այս մասին լրագրողների հետ զրույցում հայտարարել է ՌԴ նախագահի մամուլի քարտուղար Դմիտրի Պեսկովը, փոխանցում է ՏԱՍՍ-ը։
«Այստեղ մեկնաբանելու ոչինչ չկա։ Ընդհանուր առմամբ, դա Հայաստանի ինքնիշխան իրավունքն է։ Սակայն մյուս կողմից մեզ համար կարևոր է, որ նման որոշումները բացասաբար չանդրադառնան ինչպես դե յուրե, այնպես էլ դե ֆակտո մեր հարաբերությունների վրա, որոնք մենք գնահատում ենք և ձգտում ենք զարգացնել»,- ասել է Պեսկովը։
Նշենք, որ Հայաստանն այսօր պաշտոնապես միացել է ՄՔԴ-ին։ Ավելի վաղ էլ Միավորված ազգերի կազմակերպության Իրավական հարցերի գրասենյակի Պայմանագրային բաժնում տեղի ունեցած արարողության ժամանակ ի պահ էր հանձնվել Հայաստանի կողմից Միջազգային քրեական դատարանի Հռոմի ստատուտի վավերացման փաստաթուղթը։
ՀՀ նախագահ Վահագն Խաչատուրյանը հոկտեմբերի 13-ին ստորագրել էր 1998 թվականի հուլիսի 17-ին ստորագրված Միջազգային քրեական դատարանի Հռոմի կանոնադրությունը վավերացնելու և կանոնադրության 12-րդ հոդվածի 3-րդ մասի հիմքով «Հայաստանի Հանրապետության կողմից միջազգային քրեական դատարանի իրավազորությունը հետադարձորեն ճանաչելու մասին» հայտարարություն ընդունելու մասին օրենքը: Ազգային ժողովը հոկտեմբերի 3-ին 60 կողմ, 22 դեմ ձայներով ընդունել էր Միջազգային քրեական դատարանի Կանոնադրությունը վավերացնելու և հետադարձ ուժով իրավազորությունը ճանաչելու մասին հայտարարության օրենքի նախագիծը:
Էմմա Չոբանյան
