08.07.2026 | 20:08
Թրամփը վստահություն է հայտնել, որ կարող է հաշտեցնել ՌԴ-ին և Ուկրաինային, «ինչպես արել է Հայաստանի ու Ադրբեջանի դեպքում»
Բաքուն հայտարարել է, թե «Արցախի հայերը կարող են մասնակցել Ադրբեջանի նախագահական ընտրություններին»
Քաղաքականություն
29.01.2024 | 14:24
Ադրբեջանի Կենտրոնական ընտրական հանձնաժողովի նախագահ Մազահիր Պանախովը լրագրողների հետ զրույցում հայտարարել է, թե «Արցախի հայերը ևս կարող են մասնակցել արտահերթ նախագահական ընտրություններին»։ Նա նշել է, թե հայերը կարող են քվեարկել որպես Ադրբեջանի քաղաքացիներ։
2000 թվականից Ադրբեջանի ԿԸՀ նախագահի պաշտոնը զբաղեցնող Պանախովն ասել է, թե «Ադրբեջանի բոլոր քաղաքացիները՝ անկախ ազգությունից, ունեն ընտրելու նույն իրավունքը»։
Այս հայտարարություններն ուշագրավ են այն առումով, որ Արցախում էթնիկ զտում է իրականացվել և այն հայաթափվել է։ Բացի այդ, Արցախի հայերն Ադրբեջանի քաղաքացիություն չունեն։
Հիշեցնենք, որ Բաքուն Արցախի հայաթափված բնակավայրերում 26 ընտրատեղամաս է ստեղծել։ Այստեղ գրանցվել են 22,000 ադրբեջանցիներ, որոնցից 3700-ը, ըստ Բաքվի, մշտապես տեղափոխվել են այդ տարածքներ՝ բնակության: Ավելի քան 18 հազար մարդ էլ շինարարական աշխատանքներում ներգրավված ադրբեջանցիներ են։
Ադրբեջանում նախագահական ընտրությունները պետք է տեղի ունենային 2025 թվականին, սակայն նախագահ Իլհամ Ալիևը 2023-ի դեկտեմբերի 7-ին հրամանագիր էր ստորագրել փետրվարի 7-ին արտահերթ ընտրությունների անցկացման մասին։ Ադրբեջանի ղեկավարի պաշտոնի համար, գործող նախագահ Իլհամ Ալիևից զատ, ևս 6 թեկնածու է պայքարում։
Էմմա Չոբանյան
