12.09.2026 | 11:35
15-ամյան Անի Գևորգյանը սեպտեմբերի 11-ին դուրս է եկել տնից և չի վերադարձել․ ՆԳՆ
Հունվարի 28-ից ԼՂ-ից տեղահանվածները ճամփորդելիս պետք է ունենան փախստականի վկայական
Հասարակություն
26.01.2024 | 17:46
Հունվարի 28-ից ժամանակավոր պաշտպանության կարգավիճակ ստացած ԼՂ քաղաքացիները ճամփորդելիս անձնագրի հետ պետք է ունենան ժամանակավոր պաշտպանության (փախստականի) վկայական։ Այս մասին հայտնում են ՀՀ կառավարության հումանիտար կենտրոնից։ Ժամանակավոր պաշտպանության (փախստականի) վկայականը տրամադրվում է դիմումի հիման վրա: Հունվարի 25-ի դրությամբ ստացված դիմումների թիվը 42 809 է։
«Դիմումների ճնշող մեծամասնությունը տպագրվել և տրամադրվել է բռնի տեղահանված մեր հայրենակիցներին։ Բնակչության պետական ռեգիստրում ԼՂ-ից բռնի տեղահանված անձանց հաշվառումների թիվը մոտեցել է շուրջ 50 000-ի։ ՀՀ քաղաքացիություն ստանալու դիմումների թիվը շուրջ 900 է», – Հումանիտար կենտրոնում այսօր հայտնել է ՆԳՆ Միգրացիայի և քաղաքացիության ծառայության պետ Արմեն Ղազարյանը։
Ղազարյանի խոսքով՝ ժամանակավոր պաշտպանության վկայականը գործում է մեկ տարի ժամկետով, որը երկարաձգվելու է կառավարության որոշմանը գործողության երկարաձգմանը զուգահեռ։ Վկայականը պետք է գործածվի ինչպես չափահաս, այնպես էլ անչափահաս անձի պարագայում։
Ժամանակավոր պաշտպանության կարգավիճակ տրվում է հետևյալ երեք խմբերին․
-այն անձանց, ովքեր հաշվառված են այս պահի դրությամբ Լեռնային Ղարաբաղի բնակչության ռեգիստրում:
-ովքեր թեև հաշվառում չունեն, սակայն նրանց վերջին հաշվառման հասցեն եղել է Լեռնային Ղարաբաղը:
-նրանք, ովքեր հաշվառված չեն Լեռնային Ղարաբաղի բնակչության ռեգիստրում, սակայն բռնի տեղահանման արդյունքում հաշվառվել են Ներքին գործերի նախարարության միգրացիայի և քաղաքացիության ծառայության կողմից վարվող տվյալների շտեմարանում:
Ժամանակավոր պաշտպանության կարգավիճակ և վկայական չի տրվում նրանց, ովքեր բռնի տեղահանվել են ԼՂ-ից, սակայն ունեն ՀՀ քաղաքացիություն։
Հիշեցնենք, որ Կառավարության 2023 թ․ հոկտեմբերի 26-ի N 1864-Ն որոշմամբ հաստատվեց ԼՂ-ից բռնի տեղահանված անձանց ժամանակավոր պաշտպանության տակ վերցնելու, ժամանակավոր պաշտպանություն ստացած փախստականի անձը հաստատող փաստաթղթի նկարագիրը և դրա տրամադրման կարգը:
