23.11.2024 | 19:28
Ֆուտբոլի կանանց ազգային հավաքականը սկսում է նախապատրաստվել ընկերական խաղերին
Երբ Ստրասբուրգ գամ, աչքիս չերևաս․ Մարուքյանն անդրադարձել է ԵԽԽՎ-ում ուկրաինացի պատգամավորի ելույթին
Քաղաքականություն
26.01.2024 | 16:55
ՀՀ հատուկ հանձնարարություններով դեսպան Էդմոն Մարուքյանն ամոթալի է անվանել ուկրաինացի պատգամավոր Ալեքսեյ Գոնչարենկոյի պահվածքը, որն ավելի վաղ կոչ էր արել Եվրոպայի խորհրդի խորհրդարանական վեհաժողովին (ԵԽԽՎ) փոխզիջում գտնել Ադրբեջանի հետ։
ԵԽԽՎ-ում Ադրբեջանի պատվիրակության լիազորությունները չերկարացնելու առաջարկով քննարկումների ժամանակ ուկրաինացի պատգամավորը Բաքվին աջակցող հայտարարություններ էր հնչեցրել՝ մասնավորապես ասելով, որ այն «վերականգնում է իր տարածքային ամբողջականությունը» և հաշտություն կնքում Հայաստանի հետ։ Միաժամանակ, Գոնչարենկոն Ռուսաստանին և Իրանին մեղադրել է Հարավային Կովկասում իրավիճակն ապակայունացնելու մեջ։
Անդրադառնալով Գոնչարենկոյի այս ելույթին՝ Մարուքյանը հիշեցրել է, թե ինչպես էր ուկրաինացի այս պատգամավորը վրդովվել, երբ Մարուքյանը ԵԽԽՎ-ում ցույց է տվել Բաքվում 44-օրյա պատերազմից հետո ստեղծված «ավարների պուրակից» լուսանկարներ, որտեղ նաև հայ զինվորների մանեկեններ էին տեղադրված։ Ուկրաինացի պատգամավորի բուռն բողոքի արդյունքում նրան դուրս էին հրավիրել ԵԽԽՎ նիստերի դահլիճից։
«Այս երկակի ստանդարտների արդյունքում շատ հետաքրքիր է, թե ինչպես է այս ուկրաինացի պատգամավորն աշխարհից արդարություն պահանջում Ուկրաինայի համար, երբ նա չի ցանկանում նույն արդարությունը տեսնել Լեռնային Ղարաբաղի էթնիկ զտման ենթարկված հազարավոր մարդկանց համար, Ադրբեջանում ապօրինաբար պահվող ռազմագերիների համար։ Ամո՛թ քեզ, Գոնչարենկո։ Երբ ես գամ Ստրասբուրգ, համոզվի՛ր, որ աչքիս չես երևա, քո ելույթը սրտխառնոց առաջացրեց»,- X-ում գրել է Մարուքյանը։
