Քաղաքականություն
24.01.2024 | 18:53
ԵԽԽՎ-ում ադրբեջանական պատվիրակությունը հայտարարություն է տարածել կառույցի հետ իր համագործակցության առժամանակ դադարեցման մասին՝ չսպասելով լիագումար նիստի որոշմանը։
«Աշխարհում ոչ ոք, այդ թվում՝ այս դահլիճում նստածները, չեն կարող Ադրբեջանի հետ խոսել սպառնալիքների և շանտաժի լեզվով, ԵԽԽՎ պատմության մեջ երբևէ այս կազմակերպությունը նման խայտառակ պահվածք չի ունեցել։ ԵԽԽՎ-ում ձևավորված ռասիզմի, ադրբեջանատյացության և իսլամատյացության անտանելի մթնոլորտի պայմաններում ադրբեջանական պատվիրակությունը որոշում է դադարեցնել իր փոխգործակցությունն ու ներկայությունը ԵԽԽՎ-ում՝ մինչև հետագա ծանուցումը»,- ասվում է հայտարարության մեջ։
Նշենք, որ նախօրեին ԵԽԽՎ Մոնիթորինգի հանձնաժողովն առաջարկել էր չհաստատել ադրբեջանական պատվիրակության լիազորությունները։ Որոշումն ընդունվել էր ձայների մեծամասնությամբ՝ բուռն քննարկումներից հետո։ Մոնիթորինգի հանձնաժողովը համարում է, որ ադրբեջանական պատվիրակության լիազորությունները չպետք է հաստատվեն առնվազն մեկ տարի։
Թե ԵԽԽՎ-ն ինչ ձևով կսահմանափակի ադրբեջանցի պատգամավորների լիազորությունները, հայտնի կդառնա այսօր տեղի ունեցող դեբատների արդյունքում։ Լիագումար նիստի որոշմամբ կարող է ամբողջությամբ կամ մասնակիորեն սահմանափակել ադրբեջանական պատվիրակության լիազորությունները։
Ադրբեջանի լիազորությունները սահմանափակելու նախաձեռնությամբ հանդես է եկել գերմանացի պատգամավոր Ֆրանկ Շվաբեն։
Էմմա Չոբանյան
