Էրդողանը դիտարկում է Իսրայելի դեմ տնտեսական միջոցներ սահմանելու հնարավորությունը

Թուրքիայի նախագահ Ռեջեփ Թայիփ Էրդողանը դիտարկում է Իսրայելի դեմ տնտեսական պատժամիջոցներ սահմանելու հնարավորությունը՝ Գազայի վրա շարունակվող հարձակումների պատճառով, որոնք հոկտեմբերի 7-ից ավելի քան 25 հազար մարդու կյանք են խլել, գրում է Turkish Minute-ը։

Էրդողանը, որի կառավարությունը մեղադրվում է Իսրայել-ՀԱՄԱՍ պատերազմի ժամանակ Իսրայելի հետ առևտրի ծավալներն ավելացնելու համար՝ չնայած իր հակաիսրայելական հռետորաբանությանը, դիտարկում է Իսրայելը Թուրքիայի արտահանման ուղղությունների ցանկից հանելու հարցը։

Էրդողանը խիստ քննադատության է ենթարկում Իսրայելին՝ մեղադրելով «ցեղասպանություն» և «ռազմական հանցագործություններ» կատարելու մեջ։

Իսրայելական լրատվամիջոցները գրում են, որ Էրդողանը մտածում է դուրս գալ հռետորաբանությունից և որոշ տնտեսական միջոցներ ձեռնարկել Իսրայելի դեմ։

«Այս որոշման կարևոր հետևանքն այն է, որ Թուրքիան կդադարեցնի առևտրի սուբսիդավորումը և Իսրայելի հետ գործառնություններ իրականացնող բիզնեսներին աջակցությունը: Ավելին, այն հստակ ուղերձ է թուրք ձեռնարկատերերին, որ պետական օգնություն չի տրամադրվի, եթե նրանք ընտրեն Իսրայելի հետ առևտրով զբաղվելու ճանապարհը»,- գրել է The Jerusalem Post-ը:

Հակառակ Էրդողանի հակաիսրայելական քաղաքականությանը՝ Թուրքիայի Տրանսպորտի նախարարության պաշտոնական տվյալները ցույց են տալիս, որ 2023 թվականի հոկտեմբերի 7-ից դեկտեմբերի 31-ն ընկած ժամանակահատվածում թուրքական նավահանգիստներից դեպի Իսրայել օրական միջինը ութ նավ է շարժվել, ընդհանուր առմամբ՝ 701 նավարկություն։

Պաշտոնական տվյալների համաձայն՝ դեկտեմբերին Թուրքիայի արտահանումը Իսրայել կտրուկ աճել է՝ հասնելով 430,6 միլիոն դոլարի։

Թուրքիայում ՏԻՄ ընտրություններից անմիջապես առաջ Իսրայելի դեմ տնտեսական միջոցներ ձեռնարկելու՝ Էրդողանի քայլը հանգեցրել է պնդումների, որ Թուրքիայի նախագահը փորձում է սիրաշահել ընտրողներին և լռեցնել քննադատներին, որոնք մեղադրում են նրան «երեսպաշտության» մեջ։

Էմմա Չոբանյան