25.08.2026 | 23:30
Ծանրորդ Հարություն Ավետիսյանը` պատանիների Եվրոպայի առաջնության բրոնզե մեդալակիր
Ադրբեջանի Մեջլիսը կոչ է անում խզել Փարիզի հետ տնտեսական կապերը
Քաղաքականություն
18.01.2024 | 11:49
Ադրբեջանի Միլլի Մեջլիսի միջազգային հարաբերությունների և միջխորհրդարանական հարաբերությունների հանձնաժողովը հայտարարություն է ընդունել Ֆրանսիայի Սենատի՝ նախօրեին ընդունած բանաձևի կապակցությամբ։
Ադրբեջանական լրատվամիջոցների հաղորդմամբ՝ հայտարարության մեջ ասվում է, որ «Ֆրանսիայի կառավարության վարած հակաադրբեջանական քաղաքականության, այդ թվում՝ մինչ այժմ Ֆրանսիայի խորհրդարանի երկու պալատներում Ադրբեջանի դեմ ընդունված բանաձևերի շնորհիվ, երկու երկրների հարաբերությունները գտնվում են պատմության մեջ ամենացածր մակարդակի վրա և, ըստ էության, կարող են համարվել կասեցված»։
Մեջլիսի հանձնաժողովը Ադրբեջանի կառավարությանը կոչ է անում Ֆրանսիայի դեմ պատժամիջոցներ կիրառել, սառեցնել Ադրբեջանում ֆրանսիացի պաշտոնյաների բոլոր ակտիվները, դադարեցնել բոլոր տնտեսական կապերը Ֆրանսիայի հետ, երկրից դուրս բերել բոլոր ֆրանսիական ընկերությունները, ներառյալ Total-ը, և կանխել ֆրանսիական ընկերությունների մասնակցությունը Ադրբեջանի պատվերով իրականացվող նախագծերում։
Բացի այդ՝ Ադրբեջանի արտաքին գործերի նախարարությանը կոչ է արվում քայլեր ձեռնարկել Կանակայի, Մաոհի Նուիի և Կորսիկայի անկախությունը ճանաչելու ուղղությամբ։
Հիշեցնենք, որ Ֆրանսիայի Սենատում բանաձևը երեկ ընդուվել էր 336 կողմ և 1 դեմ ձայներով։ Այն դատապարտում է Արցախում Ադրբեջանի ռազմական հարձակումն ու ագրեսիան, Հայաստանի Հանրապետության տարածքային ամբողջականության ոտնահարման հետագա փորձերը։ Բանաձևը պահանջում է Ադրբեջանի դեմ պատժամիջոցների կիրառում և ԼՂ հայ բնակչության վերադարձի իրավունքի երաշխիքների սահմանում։
