Քաղաքականություն
12.01.2024 | 21:02Ամանորյա տոները հայաստանցիները նաև անցկացրին՝ քննարկելով Նիկոլ Փաշինյանի այցերը դպրոցներ, դահլիճներ, որոնց հետևեցին բարձրաստիճան պաշտոնանկություններ։ Վարչապետն աշխատանքից ազատեց երկու մարզպետի, Քաղաքաշինության կոմիտեի ղեկավարին՝ հայտարարելով, որ պաշտոնյաները պետք է հարցեր լուծեն, ոչ թե արդարացնեն կամ զուտ բարձրաձայնեն այդ հարցերը։
Մամուլում հայտնվեցին տվյալներ, որ իրապես շինարարության ժամանակ էժան ցնցուղի գինն ավելի բարձր է նշված։ ՊՎԾ-ն ստուգումներ է սկսել մի շարք պետական հիմնարկներում։
Շուրջ վեց տարի իշխանության գտնվող Նիկոլ Փաշինյանը նաև հաճախ է դժգոհում իրավապահ մարմիններից՝ կոռուպցիայի դեմ ոչ արդյունավետ պայքարելու համար․ «2018-ի հեղափոխությունն իրականացրած ժողովրդի ամենամեծ ակնկալիքը եղել է արդարությունը, կոռուպցիայի վերացումը ՀՀ-ից, բայց պետք է ցավով արձանագրել, որ այդ ակնկալիքները շարունակում են մնալ իրենց տեղում, իրականացված չեն դրանք լիարժեք»։
Ինչպիսի՞ն է պետական կառավարումը Նիկոլ Փաշինյանի օրոք, որը թերացումներ հայտնաբերելուց զատ՝ դժգոհում է նաև, որ աղմուկ-աղաղակով, դիմակ-հրազենով ձերբակալվածները մի քանի օրից սրճարաններում սուրճ են վայելում։ Շինարարության վայրերում թերությունների հայտնաբերումը խոսո՞ւմ է, արդյոք, վարչապետի և իր կառավարության արդյունավետ աշխատանքի մասին։
Այս հարցերի շուրջ Factor TV-ի տաղավարում հրավիրված քննարկմանը մասնակցում են ՔՀԿ-ների հակակոռուպցիոն կոալիցիայի կառավարման խորհրդի նախագահ Մովսես Արիստակեսյանը, «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանը, տնտեսագետ Սուրեն Պարսյանը, «Համայնքային համախմբման և աջակցության կենտրոն» ՀԿ նախագահ Օլեգ Դուլգարյանը և ԼՀԿ անդամ Անի Սամսոնյանը։
Մանրամասները՝ տեսանյութում։
