24.11.2024 | 10:01
Փակ է «Ամբերդ» կայանից դեպի Քարի լիճ տանող ավտոճանապարհը
Պենտագոնը չի կարողացել վերահսկել Կիևին տրամադրվող ամբողջ ռազմական օգնությունը
Քաղաքականություն
12.01.2024 | 19:13
ԱՄՆ Պաշտպանության նախարարությունը չի կարողացել ամբողջապես իրականացնել պահանջները՝ կապված Ուկրաինային մատակարարվող սպառազինությունների մոնիթորիգի հետ։ Այս մասին ասվում է Պենտագոնի գլխավոր տեսուչի զեկույցում, փոխանցում է DW-ի ռուսական ծառայությունը։
Դրանում ասվում է, որ 2023 թվականի հունիսի 2-ի դրությամբ՝ ավելի քան 1 միլիարդ դոլարի զենք և ռազմական տեխնիկա կամ ընդհանուր մատակարարումների 59 տոկոսը, որոնք պահանջում են վերջնական օգտագործման ուժեղացված վերահսկողություն, ժամանակին չեն գույքագրվել: Խոսքը, մասնավորապես, հակատանկային զինատեսակների, զենիթահրթիռային համակարգերի և կամիկաձե անօդաչուների մասին է։
Չհաշվառված զենքի մեծ քանակությունը փաստաթղթի հեղինակները կապում են գերատեսչության՝ մատակարարումների վերաբերյալ ամբողջական հաշվետվություն տրամադրելու անկարողությամբ: Նշվում է, որ դա, իր հերթին, «կարող է մեծացնել զենքի գողության կամ դիվերսիայի վտանգը երրորդ երկրներ»։
Զեկույցի վրա հիմնված The New York Times-ի արած հաշվարկների համաձայն՝ ամերիկյան իշխանությունները չեն կարողացել պատշաճ կերպով հաշվել մոտավորապես 40 հազար միավոր զենք։
Պաշտպանության նախարարության ստուգումը վերաբերել է ԱՄՆ-ի կողմից Ուկրաինա փոխանցված զենքի միայն մի փոքր մասին՝ ընդհանուր 1,69 մլրդ դոլար արժողությամբ։
Պենտագոնի ներկայացուցիչ Պատրիկ Ռայդերը, մեկնաբանելով գլխավոր տեսուչի զեկույցը, ճեպազրույցում հայտարարել է, որ ԱՄՆ-ը չի գտնել որևէ վկայություն Վաշինգտոնի կողմից Կիևին տրամադրված օգնության չարաշահման վերաբերյալ։
«Չկան հավաստի ապացույցներ Ուկրաինայից ԱՄՆ-ի կողմից տրամադրված ժամանակակից սպառազինության վերաուղղման վերաբերյալ»,- ասել է նա՝ նշելով, որ ուկրաինական զորքերն արդյունավետ օգտագործում են մարտի դաշտում ստացած հնարավորությունները։
Էմմա Չոբանյան
