26.06.2026 | 04:58
ԱԱ-2026. Նիդերլանդներն ու Ճապոնիան դուրս եկան փլեյ-օֆֆ. ՏԵՍԱՆՅՈՒԹ
Բաքուն Արցախի հայաթափված քաղաքներում ընտրատեղամասեր է ստեղծում․ ովքեր են քվեարկելու՝ պարզ չէ
Քաղաքականություն
11.01.2024 | 17:25
Բաքուն փետրվարի 7-ին անցկացվելիք արտահերթ նախագահական ընտրությունների համար որոշել է ընտրատեղամասեր բացել հայաթափված ու դատարկված Արցախի բնակավայրերում։ Մասնավորապես, ադրբեջանական լրատվամիջոցների հաղորդմամբ, ստեղծվել է 26 ընտրատեղամաս։ Այս մասին հայտարարել է Կենտրոնական ընտրական հանձնաժողովի նախագահ Մազահիր Պանախովը։
Նա նշել է, որ ընտրատեղամասեր են ստեղծվել դատարկված Ստեփանակերտում, Ասկերանում, Մարտակերտում և Իվանյանում։
«Տեղամասերը, որոնք մենք ստեղծել ենք ազատագրված տարածքներում, պետք է օրինակ ծառայեն այլ վայրերում ստեղծվածներին։ Նկարահանումներ պետք է իրականացվեն այդ տարածքներում ստեղծված տեղամասերում»,- ասել է Պանախովը։
Ի դեպ, նա չի հստակեցրել, թե էթնիկ զտման ենթարկված Արցախում ովքեր են մասնակցելու ընտրություններին, եթե այնտեղ ոչ ոք չի բնակվում։
Նշենք, որ Ադրբեջանի նախագահական ընտրություններին մասնակցելու է 7 թեկնածու, այդ թվում՝ գործող նախագահ Իլհամ Ալիևը։
Հավելենք, որ նախագահական ընտրություններն Ադրբեջանում պետք է տեղի ունենային 2025 թվականին, սակայն Իլհամ Ալիևը 2023-ի դեկտեմբերի 7-ին հրամանագիր ստորագրեց՝ 2024-ի փետրվարի 7-ին արտահերթ ընտրություններ անցկացնելու մասին։
Էմմա Չոբանյան
