«Եթե պետական բուժհիմնարկները վաճառվեն շուկայական գներով, բժշկական ծառայությունները կտրուկ կթանկանան». առողջապահության նախկին նախարար

2000-2003 թթ. առողջապահության նախարար Արարատ Մկրտչյանը factor.am-ի հետ զրույցում ասում է, որ եթե 2001 թ-ի հայեցակարգը չդրվի սեփականաշնորհման հիմքում և բուժհիմնարկների կոլեկտիվները հնարավորություն չստանան սեփականատեր դառնալ, բժշկական ծառայությունների գները կտրուկ կաճեն:

Նշենք, որ կառավարության մասնավորեցման ծրագրով վաճառքի են հանվել 47 պետական կառույցներ, այդ թվում 10 բուժհիմնարկներ: Դրանց թվում են՝ Ֆանարջյանի անվան ուռուցքաբանության ազգային կենտրոնը, Վնասվածքաբանության և օրթոպեդիայի գիտական կենտրոնը, Ճառագայթային բժշկության և այրվածքների գիտական կենտրոնը, Մաշկաբանության և սեռավարակաբանական բժշկագիտական կենտրոնը, «Օշական» մանկական վերականգնողական կենտրոնը, «Դիլիջան» մանկական հակատուբերկուլյոզային առողջարանը, Երևանի երկաթուղու պոլիկլինիկան, Նևրոզների կլինիկան, Հանրապետական անձավաբուժական կենտրոնը, «Արաբկիր» բժշկական համալիր-երեխաների և դեռահասների առողջության ինստիտուտի պետական սեփականություն հանդիսացող 8% բաժնեմասը և այլն:

«Եթե բուժհիմնարկները վաճառվեն շուկայական գներով, նրանցում մատուցվող բժշկական ծառայությունները կտրուկ կթանկանան, որովհետև բիզնեսի օրենքով վաճառքից հետո պետք է հետ բերեն գումարները»,- ասաց Արարատ Մկրտչյանը՝ հավելելով. «Առողջապահությունում ժամանակի մեջ օլիգարխացման պրոցես է գնում: Պետական բուժհիմնարկների հետագա ճակատագիրը պետք է լինի մասնավորեցման ծրագրում, համալիր ծրագիր չունենալու պայմաններում չենք կարող գնահատել, վա՞տ է գործընթացը, թե՞ լավ»:

Մանրամասները դիտեք factor.am-ի հետ առողջապահության նախկին նախարար Արարատ Մկրտչյանի հարցազրույցում:

Մարինե Խառատյան