23.11.2024 | 00:35
Թրամփի հետ հեռախոսազրույցը տեղեկատվական էր, բայց նաև շատ պոզիտիվ. Փաշինյան. ՏԵՍԱՆՅՈՒԹ
ՀՀ կառավարությունը շուտով մասնակցություն կունենա ևս մեկ հանքարդյունաբերող ընկերությունում
Քաղաքականություն
28.12.2023 | 20:19
ՀՀ-ն դիտարկում է հանքարդյունաբերական խոշոր ընկերություններից ևս մեկում փայաբաժին ունենալու հարցը։
Տարածքային կառավարման և ենթակառուցվածքների փոխնախարար Հովհաննես Հարությունյանը Factor.am-ի հետ զրույցում հաստատեց մեր այս տեղեկությունը։
«Այս պահին դեռ չէ, բայց՝ շուտով»,- ասաց փոխնախարարը՝ հավելելով, որ բանակցություններ են ընթանում և ընկերության անունը առայժմ հրապարակման ենթակա չէ։
Հիշեցնենք՝ Հայաստանի Հանրապետությանն է պատկանում Զանգեզուրի պղնձամոլիբդենային կոմբինատի (ԶՊՄԿ) 21․875 % բաժնեմասը։
Ըստ Հ․ Հարությունյանի՝ թեև պետական բյուջեն իր բաժին շահույթը չի ստացել ԶՊՄԿ-ից, սակայն դա «բավականին շոշափելի գումար է լինելու․ «Կառավարությունն առաջին անգամ այս տարիների ընթացքում ուղիղ որպես դիվիդենտ հանքարդյունաբերող կազմակերպությունից եկամուտ կստանա»։
Կառավարությունը 12.5 % մասնակցություն պետք է ունենա նաև «Լիդիան Արմենիա» ընկերությունում, որը պատրաստվում է շահագործել Ամուլսարի ոսկու հանքը։ Թեև այդ մասին հուշագիրը ստորագրվել է 2023 թ-ի փետրվարին, սակայն մինչ օրս բաժնեմասը փոխանցված չէ։ Փոխնախարարն այդ հանքամանքը բացատրեց նրանով, որ հուշագրի շրջանակներում նախապատրաստական աշխատանքներ են շարունակվում։
«Կառավարության կողմից բաժնեմաս ստանալը ինքնանպատակ պրոցես չի, այն իր հետ ենթադրում է բոլոր տեսակի պատասխանատու և հաշվետվողական գործիքները, որոնցով օժտված կլինի կառավարությունը։ Այսինքն՝ բաժնետեր լինելն իր հերթին պատասխանատվություն է։ Օրինակ՝ ենթակառուցվածքների անվտանգության մասով մենք պետք է հասկանանք՝ արդյո՞ք այդ պրոցեսները, ինչ պետք է տեղի ունենա, անվտանգ են, բնապահպանական հարցերը բոլորը փարատված են, դրանից հետո ֆինանասավորման պրոցեսները կբացվեն, և դրանից հետո նոր տեղի կունենա բաժնետոմսերի փոխացումը»,- ասաց Հարությունյանը։
Գայանե Խաչատրյան
