Դատարանը մերժել է Դունցովայի հայցն ընդդեմ ՌԴ ԿԸՀ-ի՝ ընտրություններին մասնակցությունը թույլ չտալու վերաբերյալ

Ռուսաստանի Դաշնության Գերագույն դատարանը դեկտեմբերի 27-ին մերժել է Ռժևից լրագրող Եկատերինա Դունցովայի հայցն ընդդեմ երկրի ընտրական հանձնաժողովի, որը հրաժարվել է գրանցել իր նախաձեռնող խմբի՝ ՌԴ նախագահի պաշտոնում ինքնառաջադրվելու համար ստորագրահավաքը։ Նա ԿԸՀ որոշումը բողոքարկել էր դեկտեմբերի 25-ին, հիշեցնում է DW-ի ռուսական ծառայությունը։

Դեկտեմբերի 23-ին Կենտրոնական ընտրական հանձնաժողովը Դունցովային թույլ չի տվել ստորագրություններ հավաքել՝ դա բացատրելով փաստաթղթերում հայտնաբերված սխալներով։ Միևնույն ժամանակ, ԿԸՀ-ն հաստատում է իր փաստարկները «բացառապես հուշագրով. նման փաստաթղթի օգտագործումը սկզբունքորեն նախատեսված չէ օրենքով, ուստի այն չի կարող հիմք հանդիսանալ որոշման համար», նշել է Դունցովան։

«Ընտրողների տվյալների սխալների մասին ԿԸՀ-ի կողմից բանավոր արված հայտարարությունները նույնպես դժվար թե հիմնավորվեն, ավելին, դրանք թվարկված են մերժման որոշման մեջ, սակայն հստակեցված չեն և հիմք չեն ընդունվում որոշման համար»,- հավելել է լրագրողը։

Նրա խոսքով՝ ընտրողների խմբի անդամների տվյալները ստուգելը նոտարի պարտականությունն է, և ԿԸՀ-ն իրավասու չէ նման ընթացակարգ իրականացնել։

Ծնունդով Կրասնոյարսկից Եկատերինա Դունցովան լրագրող է, կամավոր որոնողափրկարարական խմբի համակարգող, եղել է Ռժևի քաղաքային Դումայի պատգամավոր: Նախագահի պաշտոնում առաջադրվելու իր մտադրությունը Դունցովան բացատրել է նրանով, որ «վերջին տասը տարիների ընթացքում երկիրը սխալ ուղղությամբ է շարժվում. կուրսը բռնվել է ոչ թե զարգացման, այլ ինքնաոչնչացման համար»։ Նա հանդես է գալիս Ուկրաինայում ռազմական գործողությունների դադարեցման, ժողովրդավարական բարեփոխումների և քաղբանտարկյալների ազատ արձակման օգտին:

Նախագահական ընտրությունները Ռուսաստանում կանցկացվեն 2024 թվականի մարտի 15-ից 17-ը։ Պետության գործող ղեկավար Վլադիմիր Պուտինը հանդես է գալիս որպես «ինքնաառաջադրված» թեկնածու։

Ռուսաստանի Լիբերալ-դեմոկրատական կուսակցությունից առաջադրվել է նրա առաջնորդ Լեոնիդ Սլուցկին, ՌԴ Կոմունիստական կուսակցությունից՝ Նիկոլայ Խարիտոնովը, «Քաղաքացիական նախաձեռնությունից»՝ Մոսկվայի շրջանի պատգամավոր Բորիս Նադեժդինը, «Նոր մարդիկ» կուսակցությունից՝ Պետդումայի փոխխոսնակ Վլադիսլավ Դավանկովը։