Քաղաքականություն
19.12.2023 | 22:54
Թուրքիայի նախագահ Ռեջեփ Թայիփ Էրդողանը Հունգարիայից վերադառնալիս ինքնաթիռում լրագրողների հետ զրույցում անդրադարձել է ԵՄ-ին Անկարայի անդամակցության թեմային։ Նա խոսել է նաև Ուկրաինայի, Վրաստանի և Մոլդովայի՝ ԵՄ-ին անդամակցության մասին, հաղորդում է TRT Haber-ը։
«Նրանց թեկնածուի կարգավիճակ տալը չի նշանակում, որ նրանք կգան ու կդառնան Եվրամիության անդամ։ Գործընթացը կսկսվի նրանցից ու կանգ կառնի։ Այդ երկրներից ոչ մեկը Թուրքիան չէ։ Եվրամիությունն այսուհետ պետք է ուշադիր գնահատի Թուրքիայի դիրքորոշումը։ Սխալ է, որ Թուրքիան, որն ավելի պատրաստ է անդամակցել Եվրամիությանը, քան անդամ շատ երկրներ, տարիներ շարունակ քաղաքական խոչընդոտների պատճառով սպասում է դռան մոտ»,- հայտարարել է Էրդողանը։
Նա նշել է, որ չնայած Թուրքիայի ռազմավարական և տնտեսական ներուժին՝ տարիներ շարունակ տարբեր արդարացումներով հետաձգում են անդամակցությունը:
«ԵՄ-ն այժմ պետք է հրաժարվի այս սխալից: Թերևս Հունգարիայի նախագահության օրոք այս հարցը կարող է բոլորովին այլ կերպ քննարկվել և, համապատասխանաբար, նոր քայլ ձեռնարկվել»,- ասել է Թուրքիայի նախագահը։
Էմմա Չոբանյան
