07.10.2026 | 11:20
Հայտնի է հունահռոմեական ոճի ըմբշամարտի Հայաստանի հավաքականի կազմն ԱԱ-ում
Եվրահանձնաժողովը հետաքննություն է սկսել Իլոն Մասկի X սոցիալական ցանցի նկատմամբ
Քաղաքականություն
18.12.2023 | 23:17
Եվրահանձնաժողովը հետաքննություն է սկսել ամերիկացի գործարար Իլոն Մասկին պատկանող X սոցիալական ցանցի նկատմամբ, որը կենտրոնանալու է անօրինական բովանդակության, հարթակի տեղեկատվության մանիպուլյացիայի, ինչպես նաև թափանցիկության բարձրացմանն ուղղված սոցցանցի միջոցառումների ուղղությամբ, գրում է Euronews-ը։
Պաշտոնական հաղորդագրության համաձայն՝ հիմնական խնդիրն է պարզել՝ արդյո՞ք այն խախտել է նորմերը, որոնք սահմանվել են թվային ծառայությունների մասին նոր օրենքով։
Հոկտեմբերին հանձնաժողովը սոցցանցից պահանջել էր զեկույց ներկայացնել Իսրայելի և ՀԱՄԱՍ-ի միջև հակամարտության համատեքստում կեղծ տեղեկատվություն և ատելություն պարունակող բովանդակության տարածման վերաբերյալ: Զեկույցի տվյալները վերլուծելով՝ Եվրահանձնաժողովը որոշել է ստուգում սկսել։
«Ապացույցները, որոնք ներկայում մեր տրամադրության տակ են, բավական են X-ի դեմ պաշտոնական գործ հարուցելու համար»,- հայտարարել է թվային հարցերով եվրահանձնաժողովի փոխնախագահ Մարգրետ Վեստագերը:
«Հանձնաժողովն ուշադիր կուսումնասիրի X-ի համապատասխանությունը DSA-ի պահանջներին՝ ապահովելու, որ եվրոպացի քաղաքացիները պաշտպանված լինեն առցանց հարթակում, ինչպես պահանջում է կանոնակարգը»,- հավելել է նա։
Առաջին անգամ է, որ DSA-ի շրջանակում նման վարույթ է սկսվում։
Հավելենք, որ 2023 թվականի օգոստոսից X-ը ենթակա է ԵՄ նոր կանոնակարգերին, որոնք հարթակին պարտավորեցնում են նվազեցնել անօրինական բովանդակության, ապատեղեկատվության և բռնության տեսարանների տարածման հետ կապված ռիսկերը։
Էմմա Չոբանյան
