07.10.2026 | 18:47
Անհրաժեշտության դեպքում խստացված հսկողություն կկիրառենք․ Ավանեսյանը՝ ՌԴ-ում ժանտախտի բռնկման մասին
ԵՄ-ն կարող է Հունգարիային զրկել ձայնի իրավունքից՝ Ուկրաինային օգնության փաթեթը համաձայնեցնելու համար․ FT
Քաղաքականություն
18.12.2023 | 16:06
Որոշ եվրոպացի պաշտոնյաներ քննարկում են Հունգարիային ձայնի իրավունքից զրկելու հարցը՝ Ուկրաինային օգնության նոր փաթեթը համաձայնեցնելու համար։ Այս մասին գրում է Financial Times-ը՝ վկայակոչելով իր աղբյուրներին:
Նրանց փոխանցմամբ՝ Եվրամիության մասին պայմանագրում (ԵՄ) կա 7-րդ հոդվածը, որը թույլ է տալիս երկրին զրկել ձայնի իրավունքից՝ եվրոպական օրենսդրությունը խախտելու պատճառով։
Պարբերականը պարզաբանում է, որ ԵՄ երկրին ձայնի իրավունքից զրկելու գործընթացը կարող է արգելափակվել միության մեկ այլ անդամի կողմից։ Սակայն, ըստ FT-ի, Լեհաստանում վերջին ընտրություններից հետո ԵՄ-ում Հունգարիայի համար «երաշխավորված պաշտպան» չկա։ Չնայած դրան, շատ երկրներ «նյարդայնացած» են այդ քայլն օգտագործելու հետ կապված, որը, ըստ էության, «ԵՄ-ի ամենամեծ զենքն է անդամ երկրի դեմ»:
Այս քայլի փոխարեն եվրոպական երկրները ցանկանում են Հունգարիայի վարչապետ Վիկտոր Օրբանին ցույց տալ ԵՄ-ում երկրի մեկուսացման «իրական արժեքը»: Եթե այս քայլը չաշխատի, ապա ԵՄ 26 երկրները կարող են համաձայնագիր կնքել Ուկրաինային օգնության մասին առանց Հունգարիայի մասնակցության, սակայն դա «ժամանակ կպահանջի և կլինի միայն կարճաժամկետ լուծում», գրում է թերթը։
«Հնարավոր է, որ Հունգարիան ավելի շատ խնդիրներ ստեղծի։ Միգուցե Հունգարիան մեզ ստիպի օգտագործել այլ գործիքներ: Բայց, ի վերջո, Հունգարիան չի կարողանա մեզ հետ պահել Ուկրաինային փող տալու հարցում»,- ասել է ԵՄ-ի անանուն բարձրաստիճան պաշտոնյան՝ հավելելով, որ Օրբանը «Պուտինի խամաճիկը չէ, ինչպես ոմանք կարող են մտածել»:
Հիշեցնենք՝ անցյալ շաբաթ ԵՄ առաջնորդները չկարողացան համաձայնության գալ Ուկրաինային 50 միլիարդ եվրոյի ֆինանսական օգնության փաթեթի շուրջ: Նախաձեռնությունն արգելափակվեց Հունգարիայի վարչապետ Վիկտոր Օրբանի կողմից:
Արժույթի միջազգային հիմնադրամի ղեկավար Քրիստալինա Գեորգիևան զգուշացրել է, որ Ուկրաինային դժվարություններ են սպասվում, եթե մի քանի ամսից ավելի օգնություն չլինի։
