23.07.2026 | 16:42
Ռուբիոն հայտարարել է, թե Ուկրաինայում պատերազմի ավարտի համար «նոր գաղափարներ» են անհրաժեշտ
Նիդեռլանդների դատարանն ԱՄՆ-ին թույլատրել է կործանիչների պահեստամասեր մատակարարել Իսրայելին
Քաղաքականություն
15.12.2023 | 22:30
Նիդերլանդների կառավարությունը պարտավոր չէ դադարեցնել ԱՄՆ-ի պահեստից F-35 կործանիչների պահեստամասերի մատակարարումը Իսրայելին։ Նման որոշում է կայացրել Հաագայի շրջանային դատարանը, գրում է BBC-ի ռուսական ծառայությունը։
Պահեստամասերի փոխանցման արգելքի հայցը ներկայացվել է մի շարք հասարակական կազմակերպությունների կողմից, որոնք պնդում են, որ Նիդերլանդները խախտում է միջազգային իրավունքը՝ Իսրայելին ռազմական տեխնիկայի մասեր մատակարարելով։
Հայցում ասվում էր, որ Իսրայելը կործանիչներն օգտագործում է Գազայի հատվածում հարձակումների համար, որոնց զոհ են դարձել նաև խաղաղ բնակիչները, ինչը կարող է որակվել որպես ռազմական հանցագործություն։ Հասարակական կազմակերպությունները պնդում էին, որ ենթադրյալ խախտումների կանխարգելումն ավելի կարևոր է, քան դաշնակից երկրների հանդեպ Նիդերլանդների առևտրային կամ քաղաքական պարտավորությունների կատարումը։
Նիդերլանդների կառավարությունն ավելի վաղ հայտարարել էր, որ որոշում կայացնելուց առաջ կշռադատել է իրավիճակը և հաշվի առել Իսրայելի ինքնապաշտպանության իրավունքը:
Ըստ Reuters-ի՝ դատավորները համաձայնել են, որ կործանիչները, ամենայն հավանականությամբ, մասնակցել են Գազայի ռմբակոծմանը, հետևաբար, կարող են օգտագործվել պատերազմի օրենքների խախտմամբ։ Այնուամենայնիվ, դատարանը կարող է որոշում կայացնել միայն այն մասին՝ արդյո՞ք Նիդերլանդների կառավարությունը «ողջամիտ գնահատական» է տվել իրավիճակին՝ նախքան մատակարարումը թույլատրելը: Այս դեպքում Հաագայի դատարանը խախտումներ չի հայտնաբերել։
Էմմա Չոբանյան
