Քաղաքականություն
15.12.2023 | 23:30
Եվրախորհրդարանի մի խումբ պատգամավորներ իրենց աջակցությունն են հայտնել Ադրբեջանում իշխանությունների կողմից կալանավորված լրագրողներին։
«Ադրբեջանում կոռուպցիան հետաքննող անկախ լրագրողների նկատմամբ ճնշումներն անընդունելի են։ Եվրախորհրդարանը կանգնած է ժողովրդավարամետ ուժերի կողքին և պահանջում է անհապաղ ազատ արձակել բանտարկված լրագրողներին»,- X-ում գրել է գերմանացի պատգամավոր Վիոլա ֆոն Կրամոնը։
«Ադրբեջանում շատ անկախ լրագրողներ չեն մնացել, նրանց մեծ մասը կա՛մ ձերբակալվել է, կա՛մ լքել երկիրը անկախ լրատվամիջոցների վրա ճնշումների պատճառով: Այժմ ակնհայտ է, որ նախագահ Ալիևին ավելի շատ ոգեշնչել է Ղարաբաղում հաղթանակը, իրեն ընձեռնված հնարավորությունները Եվրամիության կողմից՝ առևտրային հարաբերությունների ընդլայնում, գազի և նավթի արտահանում Եվրոպա։ Այժմ նա իրեն բավական ուժեղ է համարում երկրում մնացած վերջին անկախ լրատվամիջոցները ոչնչացնելու համար»,- ընդգծել է ֆոն Կրամոնը «Ամերիկայի ձայն»-ի ադրբեջանական ծառայության հետ զրույցում։
Չեխիայի խորհրդարանի պատգամավոր Մարկետա Գրեգորովան էլ ասել է, որ լրագրողների ձերբակալություններն ու քաղհասարակության ներկայացուցիչների հետապնդումները պետք է համարվեն անընդունելի և կարմիր գիծ Եվրամիության համար՝ նշելով, որ Եվրահանձնաժողովը պետք է վերանայի կամ նույնիսկ չեղարկի Ադրբեջանի հետ էներգետիկ ոլորտում կնքված հուշագիրը։
«Անձամբ ես կարծում եմ, որ Փոխըմբռնման հուշագիրը չշարունակելը հնարավոր տարբերակներից է։ Երկրորդը, իհարկե, նպատակաուղղված պատժամիջոցների կիրառումն է այն պաշտոնյաների և կառավարության ներկայացուցիչների նկատմամբ, որոնք թիրախավորում են լրագրողներին և քաղաքացիական հասարակությանը, բանտարկում և նույնիսկ խոշտանգում: ԵՄ-ն դա միանշանակ կարող է անել։ Ադրբեջանի կառավարության ներկայացուցիչները մեծ քանակությամբ ակտիվներ ունեն Եվրոպայում։ Ակտիվների նկատմամբ կարող է կալանք դրվել, ինչպես ռուսական օրինակում։ Եթե նրանք շարունակեն թիրախավորել լրագրողներին, ապա այդ քայլերը կարող են ձեռնարկվել ադրբեջանցի պաշտոնյաների դեմ»,- ասել է պատգամավորը։
Factor TV-ն ավելի վաղ գրել է, որ վերջին մի քանի շաբաթվա ընթացքում Ադրբեջանում ձերբակալվել է առնվազն 8 լրագրող։
Էմմա Չոբանյան
