19.12.2025 | 23:33
ԱՄՆ-ի, Ռուսաստանի և Ուկրաինայի բանակցությունների նոր փուլը տեղի կունենա ԱՄՆ-ում առաջիկա օրերին
Ի՞նչ են օգտատերերն ամենից հաճախ Google-ում որոնել 2023 թվականին
Քաղաքականություն
12.12.2023 | 22:40
«Բարբենհայմեր» մշակութային ֆենոմենն այս տարի գլխավորել է Google-ի գլոբալ որոնման ցուցակը, մինչդեռ «Եվրատեսիլ»-ը և ChatGPT-ն հատկապես տարածված են եղել Եվրոպայում։ Ամերիկյան տեխնոլոգիական հսկան հրապարակել է իր «Որոնում 2023» զեկույցը՝ ամենամյա հետազոտություն այն մասին, թե ինչ են մարդիկ ամենաշատը որոնում համացանցի որոնողական լավագույն համակարգում, գրում է Euronews-ը։
Ինչ վերաբերում է նորություններին, ապա Իսրայելի և ՀԱՄԱՍ-ի միջև պատերազմը գլխավորել է համաշխարհային որոնումների ցուցակը, որին հաջորդել են փետրվարի երկրաշարժերը Թուրքիայում և Սիրիայում, ինչպես նաև «Տիտան» սուզանավի աղետը։
Ինչ վերաբերում է մշակութային երևույթներին, ապա զարմանալի չէ, որ այս տարի Google-ում ամենահայտնի ֆիլմը եղել է «Բարբի» ֆիլմը, որին հաջորդում է «Օփենհայմերը»։ Ամենաճանաչված հայտնիներից է Ջերեմի Ռենները, որը հունվարին ձյուն մաքրող մեքենայի հարվածից հետո հայտնվել էր լուրերի վերնագրերում:
Հանգուցյալ դերասան Մեթյու Փերին ու երգչուհի Թինա Թերներն էլ գլխավորել են այս տարի մահացած ամենահայտնի աստղերի ցուցակը։
Ճապոնական Yoasobi դուետի «Idol»-ը դարձել է Google-ի որոնումներում ամենահայտնի երգը, որին հաջորդում են ամերիկացի քանթրի աստղ Ջեյսոն Ալդիանի «Try That In A Small Town»-ը և Շակիրայի «Bzrp Music Sessions, Vol. 53»-ը՝ արգենտինացի պրոդյուսեր Bizarrap-ի հետ։ Շակիրան նաև դարձել է Google-ում այս տարի աշխարհի ամենաշատ որոնված երաժիշտը։
Նշվում է, որ Եվրոպան հայտնի է եղել թանգարանների, զբոսայգիների և մարզադաշտերի որոնումների շարքում:
Google-ի տարվա որոնման զեկույցը նաև տրամադրում է որոնումների բաշխում ըստ տարածաշրջանների և երկրների։ Եվրոպայում այս տարվա ամենաշատ որոնումներից մեկը Եվրատեսիլ երգի մրցույթն է: Շվեդիայում երկրորդ ամենաշատ որոնված աստղը Եվրատեսիլի հաղթող Լաուրինն է եղել, մինչդեռ Ֆինլանդիայում ամենաշատ որոնված աստղը Եվրատեսիլի մրցույթի մասնակից Käärijä է։
Իսկ ահա Գերմանիայում ամենից շատ փնտրվածներից է Rammstein խումբը։
Արհեստական բանականությունը նույնպես այս տարի դարձել է համաշխարհային գլխավոր միտումներից մեկը: Թեմայի նկատմամբ հետաքրքրությունը տարածել են որոնողական համակարգերը, լրատվական կայքերը և Վիքիպեդիան:
ChatGPT-ն այս տարի ամենահայտնի տեխնոլոգիական տերմինն է Ավստրիայում, Բելգիայում, Լատվիայում, Լիտվայում, Իսպանիայում, Շվեյցարիայում և Գերմանիայում:
Google-ը նշում է, որ հավաքել է 2023 թվականի որոնման արդյունքները այս տարվա հունվարի 1-ից նոյեմբերի 27-ն ընկած ժամանակահատվածի համար։
Էմմա Չոբանյան
