16.09.2024 | 23:29
Թուրքիայի իշխանությունները 2007-2023թթ․ շուրջ մեկ միլիոն կայք են արգելափակել
ԱՄԷ-ն ողջունում է Հայաստանի և Ադրբեջանի միջև խաղաղության հաստատմանն ուղղված քայլերը
Քաղաքականություն
10.12.2023 | 14:32
ԱՄԷ-ն ողջունել է Ադրբեջանի Հանրապետության և Հայաստանի Հանրապետության միջև տեղի ունեցած դրական զարգացումները և խաղաղության ամրապնդմանն ուղղված վերջին քայլերը։ Այս մասին տեղեկանում ենք ԱՄԷ ԱԳՆ-ից։
Արտաքին գործերի նախարարությունը բարձր է գնահատել երկու երկրների կողմից համաձայնեցված վստահության միջոցները և հույս հայտնել, որ այս նախաձեռնությունը կնպաստի կայունության և խաղաղության ամրապնդմանն ուղղված քայլերին, որը ներառում է Հայաստանի և Ադրբեջանի ժողովուրդների և ողջ կովկասյան տարածաշրջանի հետագա զարգացման ձեռքբերումը։
«ԱՄԷ-ն աջակցում է Հայաստանի և Ադրբեջանի միջև համաձայնեցված բոլոր միջոցառումներին, որոնք ամրապնդում են անվտանգությունն ու խաղաղությունը տարածաշրջանային և միջազգային մակարդակներում և նպաստում կայուն կարգավորմանը, որը երկու երկրների միջև կառուցողական համագործակցության նոր շրջան է նախաձեռնում»,- նշված է հաղորդագրությունում:
Նախարարությունը վերահաստատել է, որ ԱՄԷ-ն ընդգծում է համագործակցության և երկխոսության կարևորությունը՝ տարաձայնությունները խաղաղ ճանապարհով լուծելու համար։
Հիշեցնենք, որ դեկտեմբերի 7-ին Հայաստանի Հանրապետության վարչապետի աշխատակազմն ու Ադրբեջանի Հանրապետության նախագահի վարչակազմը համատեղ հայտարարություն էին տարածել։
Հայտարարության մեջ ասվում է, որ Ադրբեջանի Հանրապետությունն ազատ է արձակում 32 հայ զինծառայողների, Հայաստանն էլ իր հերթին ազատ է արձակում 2 ադրբեջանցի զինծառայողներին։
