Երևանի քաղաքապետի ժամկետանց ողջույնը․ ըստ քաղաքապետարանի կայքի՝ Տարոն Մարգարյանը դեռ քաղաքապետ է

Հանուն և ընդդեմ բողոքի տևական ցույցերից հետո, ի վերջո, հրաժարական տված Տարոն Մարգարյանը, պարզվում է, դեռ ամբողջությամբ չի ավարտել իր առաքելությունը քաղաքապետարանում կամ, գոնե, քաղաքապետարանի կայքում:

Երբ մտնում ենք Երևանի քաղաքապետարանի պաշտոնական կայք, թվում է, թե ոչինչ չի փոխվել: Ժպիտով շարունակում է մեզ ողջունել Երևանի նախկին քաղաքապետ Տարոն Մարգարյանը: Երևանի քաղաքապետարանը չի կարողանում բաժանվել սիրելի քաղաքապետից: Ու թեև 22 օր է, ինչ նա քաղաքապետ չէ, ավելին, Երևանը պատրաստվում է արտահերթ ընտրությունների, սակայն միևնույն է՝ մեզ շարունակում է ողջունել Տարոն Մարգարյանը:

Մեր օրերում չափազանց կարևոր է պետական որևէ մարմնի պաշտոնական կայքի անխափան և օպերատիվ գործունեությունը: Բոլոր նորությունները, պաշտոնական որոշումները, հաղորդագրությունները սովորաբար ստանում ենք պաշտոնական կայքերից: Ինչպե՞ս պետք է այցելուն լրջություն ցուցաբերի քաղաքապետարանի աշխատանքի նկատմամբ, եթե 22 օր առաջվա եղելությունը դեռ թարմացված չէ:

Կարծես մայրաքաղաքի կառավարումը Տարոն Մարգարյանից հետո կանգ է առել. լավ չի աշխատում տրանսպորտը, աղբահանումը և այլն: Ցույց է տրվում կարծես, թե մեկ հոգու գնալը կաթվածահար է արել ամեն ինչ, համենայն դեպս, քաղաքապետարանը դա է մեզ փորձում ցույց տալ:

Վերադառնալով կայքին՝ ասենք, որ եթե մինչև հուլիսի 9-ը մայրաքաղաքի պաշտոնական կայքից մեզ ժպտացող ու ողջունող Տարոն Մարգարյանի պատկերը միանշանակ հասնականալի էր, ապա այժմ նույն կայքից մեզ ողջունում է սովորական քաղաքացի Տարոն Մարգարյանը, որը, չգիտես ինչու, ներկայանում է որպես քաղաքապետ:

Մեր հարցին՝ ո՞րն է պատճառը, որ քաղաքապետարանի կայքում դեռ Տարոն Մարգարյանի տվյալները չեն փոփոխվել, Երևանի քաղաքապետարանի տեղեկատվության և հասարակայնության հետ կապերի վարչության պետ Արթուր Գևորգյանը հարցով պատասխանեց՝ «Նոր քաղաքապետ կա ու չի փոխվե՞լ»: Մեր պատասխանին, որ չկա, բայց մեզ ողջունում է մարդ, որը Երևանի քաղաքապետը չէ, արձագանքեց. «Երևանի քաղքապետարանի կայքի ձևաչափն այնպիսին է, որ կոնկրետ այդ հատվածում պետք է լինի Երևանի քաղաքապետի ողջույն: Ընդամենը դա է, որևէ այլ բան չկա: Երբ կլինի ընտրված քաղաքապետ, այն ժամանակ կփոխենք»:

Սևակ Հակոբյան