04.06.2026 | 11:47
Կառավարությունը հաստատեց փոխհատուցման նախագիծը. 4250 տոննա բանջարեղեն և ելակ, 10 մլն ծաղիկ հունիսին կարտահանվի․ ՏԵՍԱՆՅՈՒԹ
Ռոբերտ Քոչարյանը շարունակում է չընդունել առաջադրված մեղադրանքը, գործը հասավ Վերաքննիչ դատարան
Հասարակություն
31.07.2018 | 12:36
Հայաստանի 2-րդ նախագահ Ռոբերտ Քոչարյանի կալանավորման որոշման դեմ բողոքն այսօր նրա պաշտպանները ներկայացրել են Վերաքննիչ դատարան։ Այս մասին Factor.am-ին հայտնեց Քոչարյանի պաշտպաններից Արամ Օրբելյանը։
Վերջինս նշեց, որ, ըստ օրենքի, դատարանը պետք է վարույթ ընդունի պաշտպանների բողոքը և մինչև շաբաթվա վերջ կայացնի բողոքը քննելու վերաբերյալ որոշում։ «Երեկ եմ հանդիպել Ռոբերտ Քոչարյանի հետ։ Նա շարունակում է չընդունել իրեն առաջադրված մեղադրանքը։ Հարցաքննվելու, ցուցմունք տալու վերաբերյալ դեռևս որոշում չկա։ Այնպես որ, ակնկալում ենք, որ մինչև շաբաթվա վերջ դատարանի որոշումը պարզ կլինի»,- ասաց պաշտպանը։
Հիշեցնենք, որ հուլիսի 27-ի ուշ երեկոյան բավարարվեց Ռոբերտ Քոչարյանին կալանավորելու վերաբերյալ նախաքննական մարմնի ներկայացրած միջնորդությունը։ ՀՀ երկրորդ նախագահը կալանավորվեց 2 ամիս ժամկետով։
Հուլիսի 26-ին ՀՀ հատուկ քննչական ծառայությունը մեղադրանք է առաջադրել Հայաստանի երկրորդ նախագահ Ռոբերտ Քոչարյանին՝ 2008թ. մարտի 1-2-ի իրադարձությունների կապակցությամբ այն բանի համար, որ «նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը»:
Աղավնի Սուքիասյան
