31.05.2026 | 19:16
Մեզ սարքում են ՌԴ-ի թշնամի, տանում Ուկրաինայի ճանապարհով․ Քոչարյան․ ՏԵՍԱՆՅՈւԹ
Նոել Միքայելյանը հնարավոր է համարում պրոֆեսիոնալ բռնցքամարտի հաջորդ հնարավոր մենամարտերից մեկը Հայաստանում անցկացնելը
29.11.2023 | 19:13
Հայաստանի դրոշի ներքո հանդես եկող WBC վարկածով առաջին ծանր քաշային կարգում աշխարհի չեմպիոն Նոել Միքայելյանը հնարավոր է համարում պրոֆեսիոնալ բռնցքամարտի հաջորդ հնարավոր մենամարտերից մեկը Հայաստանում անցկացնելը:
«Աշխարհի չեմպիոնի համար մենամարտի կազմակերպումը շատ դժվար ստացվեց, քանի որ մինչ այս գոտին պատկանում էր Կոնգոն ներկայացնող բռնցքամարտիկին, իսկ ինքն էլ հասկանում էր, որ ես իր համար լուրջ մրցակից եմ»,-«Արմենպրես»-ի հաղորդմամբ` լրագրողների հետ զրույցում ասաց Միքայելյանը:
WBC վարկածով աշխարհի չեմպիոնի խոսքով` ինքը դեռ նոր-նոր է սկսել գիտակցել, որ աշխարհի չեմպիոն է և դեռևս վաղ է համարում հետագա պլանների հստակեցումը, սակայն մեծ է հավանականությունը, որ 2024 թվականի առաջին ամիսներին գոտու պաշտպանության մենամարտ կլինի: Միքայելյանը մեծ պատիվ է համարում Վիկ Դարչինյանից հետո լինել երկրորդ հայը, ով նվաճել է բռնցքամարտի աշխարհի հեղինակավոր WBC վարկածով այդ գոտին:
«Հիմա արդեն քննարկում ենք Հայաստանում պրոֆեսիոնալ բռնցքամարտի երեկո անցկացնելու հարցը, որի համար ես շատ ուրախ կլինեմ: Հպարտություն կլիներ Հայաստանում պրոֆեսիոնալ ռինգում մենամարտելը»,-ասաց նա:
Նոել Միքայելյանը 4 տարեկանում ընտանիքով Հայաստանից տեղափոխվել է Գերմանիա և բռնցքամարտով սկսել է զբաղվել հենց այնտեղ: Այնուհետ պրոֆեսիոնալ մենամարտերին նախապատրաստվելու համար հաստատվել է ԱՄՆ-ում: Պրոֆեսիոնալ ռինգում Միքայելյանն անցկացրել է 29 մենամարտ, որոնց 27-ում հաղթանակ է տոնել:
