Ադրբեջանում ևս մեկ անկախ լրատվամիջոցի ղեկավար է ձերբակալվել

Ադրբեջանում ձերբակալել են ևս մեկ անկախ լրատվամիջոցի՝ Kanal 13-ի ղեկավար Ազիզ Օրուջևին։ Նոյեմբերի 27-ի երեկոյան ոստիկանությունը խուզարկել է Օրուջևի բնակարանը։ Տեղական լրատվամիջոցներին նրա կինը՝ Լամիա Օրուջևան պատմել է, որ խուզարկությունն իրականացվել է դատարանի որոշմամբ և փաստաբան Բահրուզ Բայրամովի ներկայությամբ։

«Այս պահին մեր տանը ութ ոստիկան կա: Միայն մեկը՝ բաց դեմքով, մնացածը դիմակներով են։ Չեն խոսում խուզարկության պատճառների մասին, կամ թե ինչ են փնտրում։ Հետո նրանք տարան Ազիզին: Նույնիսկ չասացին, թե կոնկրետ ուր են տանում նրան»,- ասել է նա։

Խուզարկությունից հետո Օրուջևին որպես կասկածյալ բերման են ենթարկել։ Նրա փաստաբան Բահրուզ Բայրամովի խոսքով՝ լրագրողին մեղադրանք է առաջադրվել 188.2 հոդվածով (առանց օրենքով սահմանված սեփականության, օգտագործման կամ վարձակալության իրավունքի հողամասում ինքնակամ շինարարական աշխատանքների կատարում)։ Այս հոդվածով Օրուջևին սպառնում է 1-ից 3 տարի ժամկետով ազատազրկում։ Նա, մասնավորապես, մեղադրվում է Բաքվի Սաբայիլի շրջանի «20-րդ հատվածում» տան ապօրինի շինարարության համար։ Լրագրողը հերքում է այս մեղադրանքը՝ այն կապելով մասնագիտական գործունեության հետ։

Լամիա Օրուջևան հայտնել է, որ խուզարկությունների ընթացքում անվտանգության ուժերն առգրավել են ամուսնու երկու համակարգիչները, հեռախոսը, որը նա չի օգտագործել, և լրագրողի նախկին ձերբակալության հետ կապված փաստաթղթեր։

Ազիզ Օրուջևը նախկինում քրեական հետապնդման է ենթարկվել տնտեսական հանցագործությունների մեղադրանքով։ 2017 թվականին նա դատապարտվել է 6 տարվա ազատազրկման։ Իրավապաշտպանները նրան ճանաչել են որպես քաղբանտարկյալ։

Հետագայում պատիժը մեղմացվել էր, և 2018 թվականին նա պայմանական վաղաժամկետ ազատ էր արձակվել։ Նշենք, որ Kanal-13-ը գործում է 2008 թվականի հոկտեմբերի 10-ից։

Էմմա Չոբանյան