29.04.2026 | 23:40
Հայաստան–ՄԱԿ համագործակցություն․ ուշադրության կենտրոնում՝ խոցելի խմբերի պաշտպանությունը
Բաքուն դժգոհություն է հայտնել, որ Ադրբեջանի քաղաքացիները ԵՄ երկրների վիզա ստանալու հետ կապված դժվարությունների են բախվում
Քաղաքականություն
24.11.2023 | 22:50
Բաքվում տեղի է ունեցել Ադրբեջանի և Եվրամիության միջև վիզաների դյուրացման հարցերով համատեղ հանձնաժողովի 7-րդ հանդիպումը։ Ադրբեջանի ԱԳՆ-ի փոխանցմամբ՝ նիստին մասնակցել են Ադրբեջանի արտաքին քաղաքական գերատեսչության և պետական այլ մարմինների պաշտոնյաներ, Եվրամիության միգրացիայի և ներքին գործերի գլխավոր տնօրինության, Բաքվում Եվրամիության պատվիրակության ներկայացուցիչներ:
Նշվում է, որ կողմերը կառուցողական և հանգամանալից քննարկում են անցկացրել 2013 թվականի նոյեմբերի 29-ին ստորագրված «Ադրբեջանի Հանրապետության և Եվրամիության միջև վիզային ռեժիմի դյուրացման մասին համաձայնագրի» դրույթներից բխող պարզեցումների իրականացման մեխանիզմների և փոխշահավետ ընդլայնման հեռանկարների շուրջ։
Վկայակոչելով 2022 թվականի և մինչև 2023 թվականի նոյեմբերի 15-ի վիճակագրական տվյալները՝ ընդգծվել է, որ Ադրբեջանի և Եվրամիության քաղաքացիների փոխայցելությունների թվի զգալի աճ է գրանցվել։
Հանդիպմանը պաշտոնական Բաքուն նաև դժգոհություններ է հայտնել։
«Հանդիպման ընթացքում հակառակ կողմի ուշադրությունն է հրավիրվել Ադրբեջանում գործող ԵՄ անդամ երկրների դիվանագիտական ներկայացուցչություններ մուտքի արտոնագրի համար դիմելու ժամանակ Ադրբեջանի քաղաքացիների դժվարությունները, մտքեր են փոխանակվել դրանց վերացման մեխանիզմների շուրջ»,- ասվում է հաղորդագրության մեջ։
Էմմա Չոբանյան
