Չինաստանը հարյուրավոր մզկիթներ է ավերել և փակել երկրի հյուսիսում. Human Rights Watch

Չինաստանի իշխանությունները հարյուրավոր մզկիթներ են փակել երկրի հյուսիսում գտնվող Նինգսիա ինքնավար մարզում և Գանսու նահանգում։ Այս մասին ասվում է Human Rights Watch (HRW) իրավապաշտպան կազմակերպության նոր զեկույցում, գրում է BBC-ի ռուսական ծառայությունը։

Այս շրջանը մահմեդական բնակչության թվով երկրորդն է՝ Սինցզյան նահանգից հետո։ Ընդհանուր առմամբ, Չինաստանում ապրում է շուրջ 20 միլիոն մահմեդական։

«Չինաստանի կառավարության կողմից մզկիթների փակումը, ավերումը և վերաբաշխումը երկրում իսլամի դավանումը սահմանափակելու համակարգային ջանքերի մի մասն է»,- ասել է Human Rights Watch-ի Չինաստանի գործերով տնօրենի պաշտոնակատար Մայա Վոնգը:

Չինաստանի իշխանությունները խոսում են «մզկիթների կոնսոլիդացման» քաղաքականություն վարելու մասին, որը Human Rights Watch-ն անվանում է կրոնական ազատության իրավունքի խախտում։

Իրավապաշտպանները վերլուծել են Նինգսիա ինքնավար շրջանի երկու գյուղերի արբանյակային պատկերները։ Նրանք պարզել են, որ 2019-ից 2021 թվականներին տեղական իշխանությունները յոթ մզկիթներից հանել են գմբեթներն ու մինարեթները: Չորս մզկիթներ ենթարկվել են զգալի վերափոխումների. երեք հիմնական շինություններն ամբողջությամբ քանդվել են, ևս մեկում վնասվել է լվացման սրահը։

Ընդհանուր առմամբ, 2020 թվականից ի վեր մոտ 1,300 մզկիթ փակվել կամ վերափոխվել է Նինգսիա շրջանում, BBC-ին ասել է չինացի մահմեդականների հարցերով փորձագետ Հաննա Թեյքերը: Սա տարածաշրջանի մզկիթների ընդհանուր թվի մեկ երրորդն է։