15.09.2026 | 19:30
TRIPP-ի մեծ նախագիծը սպասում է ՍԴ-ի փոքրիկ «Այո»-ին. ՏԵՍԱՆՅՈՒԹ
Իտալիայում արգելվել է լաբորատոր պայմաններում աճեցված մսի վաճառքը
Քաղաքականություն
17.11.2023 | 23:16
Իտալիայի խորհրդարանը հավանություն է տվել օրինագծին, որն արգելում է կենդանական բջիջներից լաբորատոր պայմաններում աճեցված արհեստական մսի արտադրությունն ու վաճառքը։ Խախտողները կտուգանվեն 10 հազար եվրոյից մինչև 150 հազար եվրոյի չափով, փոխանցում է Reuters-ը։
Բացի այդ, նոր օրենքն արգելում է բուսական ծագմամբ մսի փոխարինիչների անվանումներում ներառել «սթեյք», «սալամի» և սովորական մսամթերքի այլ անվանումներ: Իտալիայի կառավարությունը հայտարարել է, որ որոշումը կպաշտպանի իտալական խոհարարական ավանդույթները, տեղական արտադրողներին և հանրային առողջությունը:
Առայժմ աշխարհում լաբորատոր աճեցված մսի ներդրման առանձին օրինակներ կան։ 2020 թվականին Սինգապուրն աշխարհում առաջինն էր, որը թույլ տվեց Eat Just-ից արհեստական հավի մսի վաճառքը: Հունիսին նման միս վաճառելու թույլտվություն տրվել է նաև ԱՄՆ-ում։
Սովորական միս արտադրողները վախենում են մրցակցությունից. անցած տարի իտալական խոշորագույն գյուղատնտեսական ասոցիացիաներից մեկը՝ Coldiretti-ն, արշավ է սկսել՝ պահանջելով արգելել նման միսը։ Ընկերության միջնորդությունը հավաքել է մոտ կես միլիոն ստորագրություն և ստացել երկրի մի քանի հազար տեղական ու մարզային վարչակազմերի աջակցությունը։
