23.11.2024 | 20:00
Չի ներկայացվել գույքի և ունեցվածքի 509 հայտարարագիր՝ 4 տարում․ ի՞նչ է սպասվում օրինախախտներին. ՔՆՆԱՐԿՈՒՄ
309 մլն դրամ` դաշնակցական նախկին պատգամավորի ընկերությանը․ ՏԵՍԱՆՅՈՒԹ
Քաղաքականություն
18.11.2023 | 12:00
ՆԳՆ-ն ջրային պարեկների համար 309 մլն դրամի «Միցուբիշի Լ200» մակնիշի ավտոմեքենա է գնել։ Ընդհանուր առմամբ, ձեռք է բերվել 20 հատ պիկապ թափքով ավտոմեքենա՝ յուրաքանչյուրի համար վճարելով 15 միլիոն 450 հազար դրամ։ Այս տեղեկությունը Factor TV-ին հասանելի է դարձել գնումների պետական համակարգից։
Ոստիկանության պարեկային ծառայությունն ավտոմեքենաները ձեռք է բերել «Մուրան» ՍՊԸ-ից։ Ընկերությունը հիմնադրվել է 2004 թվականին։
Իրավաբանական անձանց պետական ռեգիստրի տվյալների համաձայն՝ այս ընկերությունը պատկանում է 2000-ականների սկզբից ավտոմեքենաների ներկրմամբ և վաճառքով զբաղվող Շախմուրադյանների ընտանիքին։ Ընկերության 83 տոկոսը պատկանում է Լուսյա Տեր-Սարգսյանին, 8-ական տոկոսներ ունեն Կարեն և Աշոտ Շախմուրադյանները։ Լուսյա Տեր-Սարգսյանն ու Կարեն Շախմուրադյանը, ըստ ընտրողների պետական ռեգիստրի, հաշվառված են Երևանի Արամի փողոցի շենքերից մեկի նույն բնակարանում։
Կարեն Շախմուրադյանը քաղաքական ճանապարհ է անցել Հայ Հեղափոխական Դաշնակցության հետ։ 2016 թվականի մարտի 2-ին Ազգային ժողովի պատգամավորի մանդատ է ստացել, քանի որ ընդգրկված է եղել Դաշնակցության համամասնական ցուցակում։
Շախմուրադյանների ընկերությունը պարեկային ծառայության մեքենաների մատակարար է ընտրվել էլեկտրոնային աճուրդով։ «Մուրան» ՍՊԸ-ն միակն է եղել, որը մասնակցել է էլեկտրոնային աճուրդին։ Շուրջ 10 օր առաջ այս ավտոմեքենաները Ոստիկանության բարեփոխումների շրջանակում Վահե Ղազարյանը ներկայացրել էր Նիկոլ Փաշինյանին։
Պետական ֆինանսների կառավարման փորձագետ Արտակ Քյուրումյանը Factor TV-ի հետ զրույցում նշում է՝ էլեկտրոնային աճուրդով գնումները համարվում են ոչ մրցութային։
Փորձագետի խոսքով՝ ՀՀ ՆԳՆ-ն պետք է հստակեցնի, թե ինչո՞ւ են փոխադրամիջոցները ձեռք բերել առանց մրցույթի։ Այս առնչությամբ Factor TV-ն փորձեց մեկնաբանություն ստանալ ՆԳՆ աշխատակազմի ղեկավար Արա Ֆիդանյանից, սակայն նա հեռախոսազանգերն անպատասխան թողեց։
Պետական կառույցները «Մուրան» ՍՊԸ-ի հետ ընդհանուր 13 պայմանագիր են կնքել, որոնց ընդհանուր արժեքը կազմում է 580 մլն դրամ։
ՆԳՆ-ից զատ՝ այս ընկերությունից ավտոմեքենաներ գնել են ԱԱԾ-ն, ՊՊԾ-ն, ՊԵԿ-ը, Գլխավոր դատախազությունը, Շրջակա միջավայրի նախարարությունը, Արդարադատության նախարարությունը։ 13 գնումներից կեսից ավելին՝ յոթը, իրականացվել է էլեկտրոնային աճուդի միջոցով։
Մանրամասները՝ տեսանյութում։
Նարեկ Կիրակոսյան
